बीड : बीड जिल्ह्यातील गेवराई शहराच्या मध्यवर्ती भागात गुरुवारी दुपारी कॉलेजमधून घरी परतणाऱ्या एका अल्पवयीन मुलीचे दोन तरुणांनी अपहरण केले आहे. ही घटना दुपारी १२ वाजण्याच्या सुमारास पंचायत समिती कार्यालयाच्या रस्त्यावर घडली. मुलगी कॉलेजमधून पायी घरी परतत असताना दोन तरुणांनी तिला अडवले. आरोपींनी तिच्यावर हल्ला केला आणि तिला जबरदस्तीने एका कारमध्ये ढकलून, जालना जिल्ह्यातील अंबड तालुक्यातील शहागडच्या दिशेने पळून गेले. मुलीला गाडीत ढकलले जात असल्याचे पाहून आजूबाजूचे लोक हादरले आणि त्यांनी थांबवण्याचा प्रयत्न केला, परंतु आरोपींनी त्यांच्यावर गाडी घालण्याचा प्रयत्न केला. अपहरणाचा संपूर्ण प्रकार परिसरातील सीसीटीव्ही कॅमेऱ्यांमध्ये कैद झाला आहे. घटनेची माहिती मिळताच पोलिसांनी वाहन शोधण्यासाठी आणि आरोपींना पकडण्यासाठी सर्व प्रमुख मार्गांवर तात्काळ नाकाबंदी सुरू केली. पोलिसांची अनेक पथके तयार करण्यात आली आहेत. ही घटना एकतर्फी प्रेमातून घडल्याचे दिसत आहे. आरोपींना लवकरच अटक केली जाईल, असे पोलीस अधीक्षक नवनीत कंवत म्हणाले.
