Ambegaon Crime – सोन्याचे भाव सतत वाढत असल्याने स्वस्तात सोने देतो, असे सांगून महिलांची फसवणूक करणारी टोळी आंबेगाव तालुक्यात फिरत आहे. गेल्या आठवड्यात अवसरी खुर्द येथील एका महिलेला कमी पैशात सोने देण्याचे आमिष दाखवून फसविण्याचा प्रयत्न झाला होता. काही महिन्यापूर्वी अवसरी खुर्द येथील एका तरुणांना खोटे सोने देऊन दोन लाख रुपयांची फसवणूक केल्याची घटना घडली आहे. त्यामुळे स्वस्तात सोने मिळते म्हणून आमिषाला बळी पडू नये आपल्या दारात कोणी सोने घेऊन आल्यास ताबडतोब मंचर पोलीस स्टेशनला कळवावे असे आवाहन मंचर पोलीस ठाण्याचे पोलीस निरीक्षक श्रीकांत कंकाळ यांनी केले आहे.अवसरी खुर्द ता. आंबेगाव येथे सात दिवसापूर्वी एक तरुण सोन्याची खोटी चीप घेऊन एका हॉटेल व्यवसायिक महिलेकडे आला व ५० हजार रुपयांना मी तुम्हाला सोन्याची चीप देतो, असे सांगितले. मात्र, हॉटेल व्यावसायिक महिलेला शंका आल्याने तिने हे सोने सोनाराच्या दुकानात जाऊन तपासू, असे सांगितले असता त्या तरुणाने हॉटेलमधून पळ काढला. त्यामुळे या महिलेने गावातील महिलांची फसवणूक होऊ नये म्हणून रस्त्यावर फिरणाऱ्या महिला व तरुणांकडून सोने खरेदी करू नये, आपली फसवणूक टाळावी असे आवाहन केले. तसेच पाच महिन्यांपूर्वी दोन व्यक्ती मोटरसायकलवर अवसरी खुर्द येथील एका दुकानदारांकडे दीड किलो खोट्या सोन्याची माळ घेऊन आले. त्या माळेपैकी एका माळेतून दोन सोन्याचे खरे मनी दिले व म्हणाले, तुम्ही सोनाराकडे चेक करून पहा मगच आमच्याकडून सोन्याचे दागिने घ्या, असे म्हणाले. सोने खरे दाखवून खोटे दिले… त्या व्यक्तीने दुकानात जाऊन मणी तपासले असता ते खरे होते. त्यामुळे त्या दोघांवर विश्वास बसला. त्यावेळी दुकानदाराने एवढे दागिने आपण आणले कुठून, असे विचारले असता त्या व्यक्तीने आम्ही जुनी घरे पाडायला घेतो, आम्हाला नारायणगाव येथे जुने घर पाडताना सोन्याचा डबा सापडला आहे. त्यातून तुम्हाला हे दागिने देतो, असे सांगितले. तसेच तुम्ही संगमनेरला पाच लाख रुपये घेऊन या, असे सांगितले. दुकानदाराने आमच्याकडे लगेच एवढे पैसे नाहीत, सध्या तुम्हाला दोन लाख रुपये देतो, अशा प्रकारे सौदा ठरला. नंतर दुकानदार संगमनेरला गेला असता तेथे एसटी स्टँडवर फसवणूक करणारे दोघेजण आले त्यांनी दोन लाख रुपये घेतले व दुकानदाराला दीड किलो वजनाच्या खोट्या सोन्याच्या माळा दिल्या व ते निघून गेले. त्यानंतर फसवणूक करणाऱ्या दोघा व्यक्तींनी मोबाईल बंद केल्याने दुकानदाराला फसवणूक झाल्याची शंका निर्माण झाली. त्यानंतर मंचर येथील सराफा दुकानात सोने खरे की खोटे खात्री करण्यासाठी गेले असता दीड किलो सोन्याच्या माळा खोटे असल्याची खात्री झाली. संबंधित दुकानदार मंचर पोलीस स्टेशनला गेले व सर्व घटनाक्रम सांगितला.
