Bangladesh : बांगलादेशच्या ६ तेलवाहू जहाजांना होर्मूझच्या सामुद्रधुनीमधून जाण्याची परवानगी इराणी सुरक्षा परिषदेने दिली आहे, असे इराणच्यावतीने आज स्पष्ट करण्यात आले. इंधनाचा प्रचंड तुटवडा जाणवू लागला असल्यामुळे बांगलादेशाला इंधनाच्या आयातीवर विसंबून रहावे लागते आहे. कतारमधून एलएनजीची पाच जहाजे आणि सौदी अरेबियामधून कच्च्या तेलाचे एक मालवाहू जहाज होर्मुझची सामुद्रधुनी ओलांडण्याच्या प्रतीक्षेत आहेत. या जहाजांमध्ये जवळपास ५ लाख टन एलएनजी आणि सुमारे ७९ हजार टन कच्चे तेल आहे. बांग्लादेशी नागरिकांना कोणत्याही प्रकारचा त्रास होऊ नये अशी इराणची इच्छा आहे आणि होर्मुझमार्गे इंधन वाहतुकीसाठी सर्व आवश्यक मदत पुरवली जाईल, असे ढाका येथील इराणचे राजदूत जलील रहिमी जहानाबादी यांनी येथे एका पत्रकार परिषदेत सांगितले. मात्र इराणवरील अमेरिकेच्या हल्ल्यांबाबत इराणमधील बंगलादेशी राजदूतांनी निषेध न केल्याबद्दल त्यांनी नाराजी व्यक्त केली. अमेरिका आणि इस्रायलने इराणवर केलेल्या हल्ल्यांच्या आणि त्याला इराणने दिलेल्या प्रत्युत्तराच्या पार्श्वभूमीवर, बांगलादेशने पूर्वीच इराणला सामुद्रधुनीतून आपल्या जहाजांना जाण्याची परवानगी देण्याची विनंती केली होती.
