ढाका: शेजारील देश बांगलादेशातील हिंदू अल्पसंख्याकांवरील अत्याचारांची मालिका थांबण्याचे नाव घेत नाहीये. झेनाईदाह जिल्ह्यात एका ४० वर्षीय हिंदू विधवेवर सामूहिक बलात्कार करून तिला झाडाला बांधून तिचे केस कापल्याची धक्कादायक घटना समोर आली आहे. नराधमांनी या अमानुष कृत्याचा व्हिडिओ बनवून तो सोशल मीडियावर प्रसारित केल्याने जगभरातून संताप व्यक्त होत आहे. नेमकं प्रकरण काय? मिळालेल्या माहितीनुसार, झेनाईदाह जिल्ह्यातील कालीगंज उपजिल्ह्यात ही घटना घडली. पीडित महिलेने पोलिसांत दिलेल्या तक्रारीनुसार, शाहीन आणि त्याचा भाऊ हसन यांनी शनिवारी संध्याकाळी तिच्या घरात घुसून हे कृत्य केले. पीडितेने अडीच वर्षांपूर्वी शाहीनकडून जमीन आणि घर खरेदी केले होते, तेव्हापासून तो तिला अश्लील मागण्या करून त्रास देत होता. शनिवारी पीडितेच्या घरी तिचे दोन नातेवाईक आले असताना आरोपींनी जबरदस्ती घरात प्रवेश केला. आरोपींनी पीडितेवर सामूहिक बलात्कार केला आणि त्यानंतर ५० हजार टक्क्यांची मागणी केली. पीडितेने पैसे देण्यास नकार देताच, आरोपींनी तिच्या नातेवाईकांना मारहाण करून पळवून लावले. त्यानंतर पीडितेचे हातपाय झाडाला बांधून तिचे केस कापण्यात आले. या सर्व प्रकाराचा व्हिडिओ काढून तो सोशल मीडियावर व्हायरल करण्यात आला. वैद्यकीय तपासणीत पुष्टी स्थानिक नागरिकांनी पीडितेची सुटका करून तिला झेनाईदाह सदर रुग्णालयात दाखल केले. रुग्णालयाचे अधीक्षक डॉ. मुस्तफिजुर रहमान यांनी सांगितले की, वैद्यकीय तपासणीत महिलेवर अत्याचार झाल्याची पुष्टी झाली आहे. अतिरिक्त पोलीस अधीक्षक बिलाल हुसेन यांनी या प्रकरणाचा तपास करून कठोर कारवाई करण्याचे आश्वासन दिले आहे. हिंदूंवरील हल्ल्यांचे सत्र सुरूच गेल्या १५ दिवसांत बांगलादेशात चार हिंदूंची हत्या करण्यात आली आहे. १ जानेवारी: शरियतपूरमध्ये व्यावसायिक खोकन चंद्र दास यांच्यावर पेट्रोल ओतून त्यांना जिवंत जाळण्याचा प्रयत्न झाला. १८ डिसेंबर: मयमनसिंह येथे २५ वर्षीय दीपू चंद्र दास यांची ईशनिंदेच्या आरोपावरून जमावाने हत्या करून मृतदेह जाळला. २४ डिसेंबर: राजबारी येथे अमृत मंडल या तरुणाची झुंडबळी (Lynching) देण्यात आली. भारताची तीव्र चिंता – बांगलादेशातील अल्पसंख्याकांविरुद्ध सुरू असलेल्या या सातत्यपूर्ण शत्रुत्वावर भारताने तीव्र चिंता व्यक्त केली आहे. भारत सरकार बांगलादेशातील या परिस्थितीवर बारीक लक्ष ठेवून आहे. २०१२ च्या जनगणनेनुसार, बांगलादेशात हिंदूंची लोकसंख्या सुमारे ७.९५ टक्के (१.३१ कोटी) आहे, जी सध्या असुरक्षिततेच्या छायेखाली वावरत आहे.
