नेवासा : नेवासा येथील न्यायालयाच्या (Newasa News) नवीन इमारतीच्या बांधकामासाठी उच्च न्यायालयाकडून स्पष्ट आणि कठोर मार्गदर्शन मिळाले आहे. मुंबई उच्च न्यायालयाच्या न्यायमूर्ती विभा कंकणवाडी यांनी आज नेवासा न्यायालय (Newasa News) परिसरात झालेल्या या इमारतीच्या भूमिपूजन समारंभात बोलताना सांगितले की, बांधकामाच्या दर्जा आणि गुणवत्तेत कोणत्याही प्रकारची तडजोड स्वीकारली जाणार नाही. संबंधित अधिकाऱ्यांना २४ महिन्यांचा कालावधी दिला असला तरी, या कालावधीपूर्वीच काम पूर्ण झाल्यास त्यात काहीही हरकत नाही, असा स्पष्ट आदेश त्यांनी दिला. तसेच, इमारत उभी राहिल्यानंतर त्रुटी शोधण्याऐवजी सुरुवातीपासूनच योग्य देखरेख ठेवण्यासाठी समिती नेमण्याचे आवाहनही त्यांनी केले. या कार्यक्रमात व्यासपीठावर मुंबई उच्च न्यायालयाचे न्यायमूर्ती रोहित जोशी, अहमदनगर जिल्हा व सत्र न्यायालयाचे प्रभारी प्रमुख जिल्हा व सत्र न्यायाधीश आशिष पाटील, नेवासा न्यायालयाचे अतिरिक्त सत्र न्यायाधीश हरिभाऊ वाघमारे, मुंबई-गोवा बार कौन्सिलचे माजी अध्यक्ष राजेंद्र उमाप, अमोल सावंत, नेवासा तालुका वकील संघाचे अध्यक्ष अजय रिंधे उपस्थित होते. तसेच जिल्हा कोर्ट प्रॅक्टिशनर बार असोसिएशनचे अध्यक्ष लक्ष्मण घावटे यांच्यासह प्रमुख पाहुणे म्हणून आमदार विठ्ठलराव लंघे-पाटील, ज्ञानेश्वर संस्थानचे अध्यक्ष माजी आमदार पांडुरंग अभंग, नगराध्यक्ष डॉ. करणसिंह घुले, माजी जिल्हा परिषद सदस्य विजयाताई अंबाडे आदी उपस्थित होते. Newasa News न्यायमूर्ती कंकणवाडी यांनी आपल्या भाषणात नेवासाच्या संतांच्या पावन भूमीचा उल्लेख करताना सांगितले की, हा परिसर सुजलाम सुफलाम असला तरी गुन्ह्यांचा आलेख वरचढ आहे, ज्यामुळे न्यायदानाचे काम वाढले आहे. वकिलांना याचा फायदा असला तरी न्यायदानाच्या प्रक्रियेत पूर्ण झोकून देऊन काम करण्याचे आवाहन त्यांनी केले. लोक अदालतींच्या माध्यमातून वादांचे जलद निराकरण होऊन पक्षकारांचा वेळ वाया जाणार नाही यासाठी प्रभावीपणे काम करण्याचेही त्यांनी सांगितले. नगर जिल्ह्यातील न्यायालयीन कामकाज चांगले असल्याचेही त्यांनी नमूद केले. वकिलांच्या कामकाजाबाबत बोलताना त्यांनी महत्त्वपूर्ण मुद्दे मांडले. न्यायालय किंवा आवारात काही घटना घडल्यास त्याला जबाबदार कोण हे शोधण्याऐवजी वकिलांनी काम बंद ठेवणे चुकीचे आहे. असे करणे पक्षकारांवर अन्याय आहे आणि त्यांचा वेळ निष्कारण वाया जातो. वकिलांना सन्मानाची वागणूक मिळाली पाहिजे, पण कामकाज थांबवणे योग्य नाही, असे स्पष्ट केले. उच्च न्यायालयात कामकाज इंग्रजीत चालते, तर वकिलांची इंग्रजी कमकुवत असल्यास अडचणी येतात आणि नेमके काय सांगायचे हे समजत नाही, असे वास्तवही त्यांनी मांडले. ज्येष्ठ वकिलांनी नवीन वकिलांना केसेस चालवण्याची संधी द्यावी, कारण अनुभवाशिवाय ते प्रगती करू शकत नाहीत, असा सल्लाही दिला. कार्यक्रमात न्यायमूर्ती रोहित जोशी, अतिरिक्त सत्र न्यायाधीश हरिभाऊ वाघमारे, राजेंद्र उमाप, अमोल सावंत, अजय रिंधे, लक्ष्मण घावटे यांनीही आपली मनोगते व्यक्त केली. सूत्रसंचालन न्यायमूर्ती डॉ. प्रणिता सुगावकर आणि विधिज्ञ अनिता मोटे यांनी केले, तर आभार अतिरिक्त सत्र न्यायाधीश हरिभाऊ वाघमारे यांनी मानले. यावेळी विधिज्ञ चंद्रकांत कदम, सुदाम ठुबे, राजू इनामदार, संजय राऊत, अण्णासाहेब अंबाडे, जावेद इनामदार, अशोक करडक, संजय सुखधान, नायब तहसीलदार चांगदेव बोरुडे, मुख्याधिकारी निखिल फराटे, पोलीस निरीक्षक महेश पाटील, नगरसेवक प्रवीण सरोदे, असिफ पठाण, महेश लोखंडे, कृष्णा परदेशी, संदीप सरकाळे, राम केंदळे यांच्यासह सामाजिक, धार्मिक आणि राजकीय क्षेत्रातील अनेक मान्यवर मोठ्या संख्येने उपस्थित होते. नेवासा न्यायालयाच्या या नवीन इमारतीच्या बांधकामाला उच्च न्यायालयाकडून मिळालेल्या या कडक निर्देशांमुळे बांधकामाची गुणवत्ता आणि वेळेत पूर्ण होण्याची हमी मिळाली आहे. तसेच, न्यायव्यवस्था आणि वकिलांच्या भूमिकेबाबत न्यायमूर्ती कंकणवाडी यांनी दिलेले मार्गदर्शन स्थानिक न्यायव्यवस्थेसाठी प्रेरणादायी ठरले आहे.
