नेवासा : (राजेंद्र वाघमारे) – नेवासे नगरपंचायत निवडणुकीत महायुतीचे शिवसेना (शिंदे गट) उमेदवार डॉ. करणसिंह घुले यांनी दणदणीत विजय मिळवला. त्यांना ७,०७१ मते मिळाली, तर क्रांतीकारी शेतकरी पक्षाचे उमेदवार नंदकुमार पाटील यांना ५,१०६ मते मिळाली. डॉ. घुले यांनी पाटील यांचा १,९६५ मतांच्या फरकाने पराभव करत नगराध्यक्षपद पटकावले. यापूर्वी विधानसभा निवडणुकीत शिवसेनेचे आमदार विठ्ठलराव लंघे-पाटील यांनी विजय मिळवला होता. आता नगरपंचायतीवर पुन्हा भगवा फडकावला गेला आहे. माजी मंत्री शंकरराव गडाख यांच्या क्रांतीकारी शेतकरी पक्षाला नगरसेवकांच्या जागांवर चांगले यश मिळाले. पक्षाने ९ जागा जिंकल्या, तर त्यांचा सहकारी पक्ष आम आदमी पार्टीने १ जागा मिळवली. एकूण १० जागांवर गडाख गटाचा विजय झाला. मात्र, नगराध्यक्षपद गमावल्याने त्यांची राजकीय अवस्था ‘गड आला पण सिंह गेला’ अशी झाली आहे. दुसरीकडे, राष्ट्रवादी काँग्रेसला या निवडणुकीत मोठा धक्का बसला. माजी आमदार बाळासाहेब मुरकुटे यांनी पक्षाकडून स्वतंत्र उमेदवार उभा केला होता, तरीही राष्ट्रवादीला एकही जागा जिंकता आली नाही. नगराध्यक्षपदाच्या उमेदवार सचिन कडू यांना अवघी ६३५ मते मिळाली. त्यापेक्षा काँग्रेसचे उमेदवार आल्ताफ पठाण यांनी १,४३१ मते मिळवून राष्ट्रवादीपेक्षा अधिक मते घेतली. हा निकाल नेवासेच्या राजकीय वर्तुळात चर्चेचा विषय ठरला आहे. नगरसेवक जागांचे चित्र एकूण १७ जागांपैकी: – क्रांतीकारी शेतकरी पक्ष : ९ जागा – शिवसेना (शिंदे गट) : ४ जागा – भारतीय जनता पार्टी : २ जागा – आम आदमी पार्टी : १ जागा – अपक्ष : १ जागा प्रभागनिहाय विजयी उमेदवार शिवसेना (शिंदे गट): – प्रभाग ३ : अंकुश कचरू म्हस्के – प्रभाग ७ : भारती कृष्णा परदेशी – प्रभाग ८ : मेघा संदीप सरकाळे – प्रभाग १७ : अनिल भाऊसाहेब पवार भारतीय जनता पार्टी – प्रभाग ५ : महेश शंकरराव लोखंडे – प्रभाग ९ : शितल निरंजन डहाळे आम आदमी पार्टी : – प्रभाग २ : शालीनी संजय सुखधान (सर्वाधिक ७१९ मतांनी विजयी) अपक्ष : – प्रभाग १६ : प्रवीण शामराव सरोदे क्रांतीकारी शेतकरी पक्ष : – प्रभाग १ : जयश्री चंद्रकांत शिंदे – प्रभाग ४ : जितेंद्र भाऊसाहेब कुरहे – प्रभाग ६ : संभाजी शिवाजी छोरे – प्रभाग १० : स्वप्निल राजेंद्र मापारी – प्रभाग ११ : शहिदाबी इलायतखान पठाण – प्रभाग १२ : सोनल राहुल चव्हाण – प्रभाग १३ : नसरीन मुक्तार पठाण – प्रभाग १४ : शोभा प्रताप व्यवहारे – प्रभाग १५ : प्रतिभा जालिंदर गवळी नेवासा नगरपंचायतीवर महायुतीचे वर्चस्व कायम राहिले असून, डॉ. करणसिंह घुले यांच्या नेतृत्वाखाली शहराच्या विकासाला नवे वळण मिळेल, अशी अपेक्षा व्यक्त होत आहे.
