Ashok Kharat: स्वत:ला ‘कृष्णाचा अवतार’ भासवून आणि दैवी शक्तीचे आमिष दाखवून फसवणूक करणाऱ्या कॅप्टन अशोक खरात या भोंदू बाबाचा आणखी एक कारनामा उघडकीस आला आहे. अहिल्यानगर जिल्ह्यातील नेवासा फाटा येथील एका कापड व्यावसायिकाला व्यवसायातील अडचणी दूर करण्याचे प्रलोभन दाखवून, या भोंदूने २ लाख ६२ हजार रुपये आणि सोन्याच्या अंगठ्या असा ऐवज लुटला आहे. याप्रकरणी नाशिकच्या सरकारवाडा पोलीस ठाण्यात गुन्हा दाखल करण्यात आला आहे. काय आहे नेमके प्रकरण? नेवासा फाटा येथील गाडेनगर भागात राहणारे राजेंद्र नानासाहेब भागवत (वय ३९) यांचे कापड दुकान आहे. व्यवसायात प्रगती व्हावी आणि अडचणींचे निवारण व्हावे, अशी त्यांची इच्छा होती. याचाच फायदा आरोपी अशोक खरात याने घेतला. “मी कृष्णाचा अवतार असून तुमच्याकडे असलेल्या सोन्याच्या अंगठ्यांमध्ये मंत्रबद्ध पुष्कराज आणि हिरा बसवून देतो, ज्यामुळे तुम्हाला दैवी शक्ती प्राप्त होईल,” असा बनाव खरातने रचला. सोन्याच्या बदल्यात दिले खोटे खडे – खरातने भागवत यांचा विश्वास संपादन करून त्यांच्याकडून २० ग्रॅम वजनाच्या सोन्याच्या अंगठ्या घेतल्या. त्या बदल्यात त्याने पिवळ्या धातूच्या बनावट अंगठ्यांमध्ये खोटे पुष्कराज आणि हिरे बसवून दिले. इतकेच नव्हे तर, विविध विधींच्या नावाखाली त्याने भागवत यांच्याकडून २ लाख ६२ हजार रुपये रोख उकळले. आपली फसवणूक झाल्याचे लक्षात येताच भागवत यांनी पोलिसांत धाव घेतली. त्यांच्या फिर्यादीवरून सरकारवाडा पोलिसांनी अशोक खरात विरुद्ध गुन्हा दाखल केला आहे. पोलिस तपास सुरू या प्रकरणाचा पुढील तपास पोलीस उपनिरीक्षक पाटील करत आहेत. या भोंदू बाबाने ग्रामीण भागासह राज्यात आणखी किती लोकांना अशा प्रकारे गंडा घातला आहे, याचा शोध आता पोलीस घेत आहेत. या कारवाईमुळे भोंदूगिरी करणाऱ्यांचे धाबे दणाणले आहेत.
