प्रभात वृत्तसेवा राजगुरूनगर – खेड तालुक्यात पुणे जिल्हा परिषद आणि पंचायत समितीच्या पंचवार्षिक निवडणुकीचे बिगुल वाजले असून राजकीय वातावरण तापण्यास सुरुवात झाली आहे. निवडणूक निर्णय अधिकारी अनिल दौंडे यांनी दिलेल्या माहितीनुसार, गेल्या दोन दिवसांत जिल्हा परिषदेसाठी ५५ आणि पंचायत समितीसाठी १०५ अशा एकूण १६० अर्जांची विक्री झाली आहे. प्रत्यक्ष उमेदवारी अर्ज दाखल करण्याच्या प्रक्रियेत जिल्हा परिषदेसाठी दोन अर्ज तर पंचायत समितीसाठी तीन अर्ज आतापर्यंत प्राप्त झाले आहेत.खेड तालुक्यात यावेळी जिल्हा परिषदेचा एक गट आणि पंचायत समितीचे दोन गण वाढले असून आता एकूण ८ गट आणि १६ गण झाले आहेत. या निवडणुकीसाठी भुदेव कान्हू शिंदे यांनी जिल्हा परिषद पिंपळगाव गटातून आणि मरकळ गणातून प्रत्येकी एक अर्ज दाखल केला आहे. तसेच आज अमर मच्छिंद्र बोऱ्हाडे यांनी वाफगाव गणातून आपला उमेदवारी अर्ज निवडणूक निर्णय अधिकाऱ्यांकडे सुपूर्द केला. तालुक्यात एकूण २ लाख ९९ हजार ७९ मतदार असून यामध्ये १ लाख ५२ हजार ९१५ पुरुष आणि १ लाख ४६ हजार १५६ महिला मतदारांचा समावेश आहे. अर्जांची वाढती विक्री पाहता यंदाची निवडणूक अत्यंत चुरशीची होणार असल्याचे चित्र दिसत आहे.
