Satara:  जिल्हा परिषदेकडील विविध योजनांचा लाभ देऊन एकल महिलांची आर्थिक व सामाजिक उन्नती केली जाईल. त्यासाठी जिल्हा परिषद कटिबद्ध आहे, अशी ग्वाही जिल्हा परिषदेच्या अध्यक्षा डॉ. सौ. प्रिया शिंदे यांनी केले.

जिल्हा परिषदेच्या यशवंतराव चव्हाण बहुउद्देशीय सभागृहात एकल महिला दिनानमित्त कार्यशाळेचे उद्घाटन डॉ. शिंदे यांच्या हस्ते झाले. त्यावेळी त्या बोलत होत्या. यावेळी उपाध्यक्ष राजू भोसले, महिला व बाल विकास समिती सभापती सौ. ऋतुजा शिंदे, कृषी सभापती सौ. लता कर्णे, जिल्हाधिकारी संतोष पाटील, मुख्य कार्यकारी अधिकारी याशनी नागराजन, जिल्हा विधी सेवा प्राधिकरणाच्या सचिव प्रियदर्शनी वाघमारे, अतिरिक्त मुख्य कार्यकारी अधिकारी राहुल गावडे, उपमुख्य कार्यकारी अधिकारी नीलेश घुले, राहुल देसाई, प्रज्ञा माने भोसले, शिक्षणाधिकारी (योजना) शबनम मुजावर, महिला व बाल विकास अधिकारी शिल्पा पाटील, जिल्हा कार्यक्रम अधिकारी नागेश ठोंबरे, स्वयंम सामाजिक संस्थेच्या शीतल विधाते, मनोज विधाते, सचिन कांबळे, फोनिक्स इंटरनॅशनल ट्रस्टचे संस्थापक रमेश शिंदे यांच्यासह जिल्हा परिषद सदस्य उपस्थित होते.

जिल्हाधिकारी पाटील म्हणाले, ‘जिल्ह्यात नोव्हेंबर २०२५ पासून सुरु असलेल्या एकल महिलांच्या सर्वेक्षणात १ लाख ५७ हजार एकल महिला आढळल्या. या महिलांना छत्रपती शिवाजी महाराज महाराजस्व अभियानांतर्गत विविध योजनांचा लाभ व विविध दाखल्यांचे वाटप करण्यात आले आहे.’ ‘जिल्हा परिषदेच्या योजनांद्वारे या महिलांची उन्नती साधली जाईल, असे याशनी नागरान यांनी सांगितले. यशवंतराव चव्हाण समाजकार्य महाविद्यालयाचे संकेत माने यांनी महिलांसाठी नोकरी विषयक मार्गदर्शन केले. ॲड. मनीषा बर्गे यांनी कायदेविषयक अडचणी व उपाययोजनांची माहिती दिली. यावेळी राजू भोसले व ऋतुजा शिंदे यांची भाषणे झाली. शिधापत्रिका, संजय गांधी निराधार, बाल संगोपन यांसह विविध योजनांचा एकल महिलांना प्रातिनिधिक स्वरुपात लाभ देण्यात आला. स्वयंम सामाजिक संस्थेच्यावतीने महिलांना शिलाई मशिनचे वाटप झाले. नागेश ठोंबरे यांनी प्रास्ताविक केले. सारिका ढाणे यांनी सूत्रसंचालन केले. शिल्पा पाटील यांनी आभार मानले.