Satara: वारंवार फोन आणि मेसेज करून बोलण्याचा तगादा लावणे, दुसर्‍या कोणाशीही बोलू नकोस म्हणून दबाव आणणे, शिवीगाळ व मारहाण करून मानसिक त्रास देणे, या छळाला कंटाळून 19 वर्षीय युवतीने विषारी औषध प्राशन करून आत्महत्या केल्याची धक्कादायक घटना समोर आली आहे. याप्रकरणी शाहूपुरी पोलीस ठाण्यात 21 वर्षीय तरुणाविरोधात आत्महत्येस प्रवृत्त केल्यासह विविध कलमान्वये गुन्हा दाखल करण्यात आला आहे.

याबाबत पोलिसांकडून मिळालेल्या माहितीनुसार, श्रेया लक्ष्मण खामकर (वय 19, रा. सोनवडी, ता. सातारा) असे मृत युवतीचे नाव आहे. संशयित सोमनाथ कडव (वय 21, रा. साबळेवाडी, ता. सातारा) याच्याविरोधात तिच्या वडिलांनी फिर्याद दिली आहे. जून 2026 पासून 9 नोव्हेंबरपर्यंतच्या कालावधीत करंजे येथील लँडमार्क टॉवरच्या पाठीमागील राजमुद्रा अभ्यासिकेच्या परिसरात हा प्रकार घडल्याचे फिर्यादीत नमूद आहे. संशयित तरुणाने श्रेयाला वारंवार फोन आणि मेसेज करून आपल्याशीच बोलण्याचा आग्रह धरला. दुसर्‍या कोणाशीही बोलायचे नाही, असा दबाव टाकत तिला शिवीगाळ व मारहाण करून मानसिक त्रास दिल्याचा आरोप करण्यात आला आहे.

श्रेया हिच्या वडिलांनी संबंधित तरुणाला तिच्याशी बोलू नकोस, कोणताही संबंध ठेवू नकोस, असे वारंवार बजावले होते. मात्र, त्यानंतरही त्याचा त्रास सुरूच होता. या सततच्या मानसिक छळाला कंटाळून श्रेयाने राजमुद्रा अभ्यासिकेत विषारी औषध प्राशन करून जीवन संपवले. विष प्राशन केल्यानंतर तिची प्रकृती खालावली असतानाही संशयिताने तिला उपचारासाठी घेऊन जाण्यात दिरंगाई व निष्काळजीपणा केल्याचाही आरोप करण्यात आला आहे.

या प्रकरणी शाहूपुरी पोलीस ठाण्यात भारतीय न्याय संहितेच्या कलम 108, 125 (अ), 115 (2), 352, 351 (2) व 351 (3) अन्वये गुन्हा दाखल करण्यात आला आहे. संशयिताला अद्याप अटक करण्यात आलेली नाही. पोलीस निरीक्षक दत्तात्रय देशमुख तपास करत आहेत.