प्रभात वृत्तसेवा कराड – येथील कृष्णा नदीच्या पुलावरून नदीपात्रात उडी घेतलेल्या कल्पना बाळाप्पा वाघमारे (वय 26, रा. वाखाण रोड, कराड, मुळ रा. जत, जि. सांगली) या युवतीचा मृतदेह तब्बल सहा दिवसांनी गोंदी गावच्या हद्दीत नदीपात्रामध्ये आढळून आला. रविवारी सकाळी पात्रात मृतदेह तरंगताना निदर्शनास आल्यानंतर ग्रामस्थांनी याबाबतची माहिती पोलिसांना दिली. पोलिसांनी घटनास्थळी भेट देवून पंचनामा केला. त्यानंतर मृतदेह उत्तरीय तपासणीसाठी पाठवून देण्यात आला. शहरातील वाखाण रोड येथे राहणार्या कल्पना वाघमारे या युवतीने सोमवारी, दि. 28 जुलै रात्री साडेनऊ वाजण्याच्या सुमारास कृष्णा नदीपात्रात उडी घेतली होती. कल्पनाचे लग्न ठरले होते. तसेच काही दिवसांपूर्वी तिचा साखरपुडाही झाला होता. मात्र, अचानक सोमवारी रात्री साडेनऊ वाजण्याच्या सुमारास तिने नदीपात्रात उडी घेतली. कल्पना सोमवारी रात्री दुचाकीवरून पुलावर आली. त्याठिकाणी दुचाकी उभी करून ती मोबाईलवर कोणाशी तरी बोलत होती. त्यानंतर काही मिनिटातच तिने नदीपात्रात उडी घेतली. घटनास्थळी दाखल झालेल्या पोलिसांनी तीची सॅक तपासली असता तिची ओळख पटली. या घटनेनंतर एनडीआरएफचे जवान तसेच मच्छीमारांकडून नदीपात्रात शोध घेण्यात आला. गत सहा दिवसांपासून तिचा शोध घेतला जात होता. मात्र, तिचा मृतदेह सापडला नाही.रविवारी सकाळी गोंदी गावच्या हद्दीतील नदीपात्रात एका युवतीचा मृतदेह पाण्यावर तरंगताना आढळून आला. ग्रामस्थांनी याबाबतची माहिती दिल्यानंतर कराड ग्रामीण पोलीस ठाण्याचे अधिकारी व कर्मचार्यांनी त्याठिकाणी भेट देवून पंचनामा केला. संबंधित मृतदेह कल्पनाचा असल्याचे निष्पन्न झाल्यानंतर नातेवाईकांना याबाबतची माहिती देण्यात आली. याबाबतची नोंद कराड शहर पोलीस ठाण्यात झाली आहे.
