संगमनेर – मोबाईल टॉवरवर विविध प्रकारचे पक्षी आराम करीत असतात त्यांना पकडण्यासाठी रविवारी रात्री अंदाजे एक दीडच्या सुमारास तरूण दारूच्या नशेत मोबाईल टॉवरवर चढला. परंतु टॉवर जास्त उंचीवर गेल्यानंतर तोल न सांभाळता आल्याने या तरुणाचा टॉवरवरून पडून मृत्यू झाल्याची घटना संगमनेर तालुक्‍यातील अंभोरे येथे घडली. गणेश भास्कर गवळी (वय 27 रा. अंभोरे) असे मृताचे नाव आहे.

याबाबत सविस्तर माहिती अशी की, गणेश गवळी हा तरूण लहानपणापासूनच अंभोरे येथे त्याचा मेव्हणा काळू बर्डे यांच्याकडे राहत होता. लग्नानंतरही गणेश पत्नी दोन मुलीसह येथेच राहत होता.रात्री शेजारी वरात होती.त्यामुळे त्या ठिकाणी तो दारू पिला. तो दारूच्या नशेत पाखर पकडण्यासाठी गावातील बंद असलेला मोबाईल टॉवरवर चढला.

प्रमाणापेक्षा जास्त उंचीवर गेल्यानंतर तोल न सांभाळता आल्यामुळे तो खाली कोसळला. खाली येत असताना टॉवरच्या मध्यभागी लोखंडी अँगलला लटकला. सकाळी गावातील टॉवर शेजारील लोकांनी पाहिले असता पोलीस पाटील विनोद साळवे यांना सविस्तर माहिती सांगितली.

पोलीस पाटीलांनी सदर ठिकाणी प्रत्यक्षात जाऊन बघितल्यानंतर व्यक्ती मृत झाल्याचे निदर्शनास आले. त्यावेळी त्यांनी संगमनेर ग्रामीण पोलीस स्टेशनला माहिती देऊन मृतदेह तपासणीसाठी संगमनेर कॉटेज हॉस्पिटलला पाठविला.