Nana Patekar : ज्येष्ठ अभिनेते नाना पाटेकर यांच्या निधनाने मनोरंजनसृष्टीसह सामाजिक आणि राजकीय क्षेत्रातूनही हळहळ व्यक्त केली जात आहे. अभिनयासोबतच सामाजिक कार्यातून आपली वेगळी ओळख निर्माण करणाऱ्या नाना पाटेकर यांच्या अचानक जाण्याने अनेकांना मोठा धक्का बसला आहे.

रंगभूमीपासून सुरू झालेला नाना पाटेकर यांचा प्रवास पुढे चित्रपटसृष्टीत स्थिरावला. आपल्या दमदार अभिनयासोबतच प्रभावी संवादफेकीसाठी ते विशेष ओळखले जात होते. त्यांनी साकारलेल्या विविध भूमिका प्रेक्षकांच्या कायम स्मरणात राहिल्या.

अभिनयासोबतच ‘नाम फाऊंडेशन’च्या माध्यमातून त्यांनी शेतकऱ्यांसाठी केलेल्या कामाचीही मोठ्या प्रमाणावर चर्चा होत आहे. नाना पाटेकर यांच्या निधनानंतर खासदार संजय राऊत यांनी त्यांच्या आठवणींना उजाळा देत श्रद्धांजली वाहिली. यावेळी त्यांनी नाना पाटेकर आणि शिवसेनाप्रमुख बाळासाहेब ठाकरे यांच्यातील एक जुना किस्साही सांगितला.

‘नाना अजातशत्रू होते. वरून कठोर वाटत असले तरी ते अतिशय हळव्या मनाचे आणि संवेदनशील व्यक्ती होते. ते परखड होते,’ अशा शब्दांत संजय राऊत यांनी नाना पाटेकर यांच्या स्वभावाचं वर्णन केलं.

तुम्हाला रागावण्याचा अधिकार आहे

बाळासाहेब ठाकरे आणि नाना पाटेकर यांच्या भेटीचा किस्सा सांगताना राऊत म्हणाले की, पु. ल. देशपांडे यांच्याबाबत नाना पाटेकर यांनी केलेल्या वक्तव्यावरून बाळासाहेब ठाकरे नाराज झाले होते. त्यानंतर नाना मातोश्रीवर गेले आणि बाळासाहेबांसमोर बसले. बाळासाहेब त्यांच्यावर रागावले असता नाना म्हणाले, ‘तुम्ही आमचे वडील आहात. तुम्हाला रागावण्याचा अधिकार आहे.’ नाना पाटेकर बाळासाहेब ठाकरे यांना मार्गदर्शक आणि पित्यासमान मानत होते, अशी आठवणही संजय राऊत यांनी सांगितली.

नाना पाटेकर यांच्या स्पष्टवक्तेपणाचाही राऊत यांनी विशेष उल्लेख केला. ‘नाना इतर कलाकारांसारखे गप्प बसले नाहीत. जे पटले आणि जे पटले नाही, ते त्यांनी परखडपणे बोलून दाखवलं. त्यांची मतं कोणाला पटली असतील किंवा नसतील; मात्र त्यांनी आपलं मत मांडण्याचा अधिकार कायम जपला,’ असं राऊत म्हणाले.

यावेळी संजय राऊत यांनी आपल्या आजारपणातील नाना पाटेकर यांच्या सहकार्याचीही आठवण सांगितली. आजारपणात नाना नियमितपणे फोन करून त्यांची विचारपूस करायचे. आहारात कोणते बदल करावेत, याबाबतही ते मार्गदर्शन करायचे.

त्यांच्या अचानक जाण्याने मीही अस्वस्थ आणि दु:खी

‘माझ्या आजारपणात नाना हे एकमेव व्यक्ती होते, जे किमान एक दिवसाआड कुठेही असले तरी मला फोन करून धीर द्यायचे. ते मला मार्गदर्शन करायचे, आहारात काय बदल केले पाहिजेत हे सांगायचे. इतक्या आत्मीयतेने ते माझी काळजी घेत होते. त्यांच्या अचानक जाण्याने मीही अस्वस्थ आणि दु:खी आहे,’ अशा शब्दांत संजय राऊत यांनी आपल्या भावना व्यक्त केल्या.

Nana Patekar Death: ‘अभिनयाचा नाना’ ते कारगिलचा जवान ; दोन महिने सीमेवर राहून शत्रूशी लढले, जाणून घ्या लष्कराशी नातं