UP Election 2027 : सीएम योगी आणि अखिलेश यादव एकाच मतदारसंघातून निवडणूक लढवणार? यूपीत वातावरण तापलं
UP Election 2027 : उत्तर प्रदेशचे मुख्यमंत्री योगी आदित्यनाथ यांनी अखिलेश यादव यांना अयोध्येतून निवडणूक लढवण्याचे आव्हान दिले आहे. दोघेही २०२७ मध्ये एकाच मतदारसंघातून लढणार का?

UP Election 2027 : उत्तर प्रदेशातील २०२७ च्या विधानसभा निवडणुकीच्या पार्श्वभूमीवर मुख्यमंत्री योगी आदित्यनाथ आणि समाजवादी पक्षाचे प्रमुख अखिलेश यादव यांच्यात राजकीय संघर्ष सुरू आहे. अखिलेश यादव यांनी अयोध्येतून निवडणूक लढवण्याचे आव्हान दिल्यानंतर योगी यांनीही प्रत्युत्तर दिले आहे.
अखिलेश यांनी अयोध्येतून उमेदवारी अर्ज भरल्यास आपणही त्याच मतदारसंघातून अर्ज दाखल करू, असे योगी यांनी जाहीर केले. त्यामुळे आगामी निवडणुकीत दोन्ही नेते एकाच मतदारसंघातून आमनेसामने येणार का, याची चर्चा सुरू झाली आहे.
गुरुवारी (१९ नोव्हेंबर) गोरखपूर जिल्ह्यातील कॅम्पियरगंज येथे आयोजित कार्यक्रमात योगी बोलत होते. यावेळी त्यांनी अखिलेश यांचे नाव न घेता त्यांना थेट निवडणूक लढवण्याचे आव्हान दिले. ”तुम्ही अयोध्येतून उमेदवारी अर्ज भरा, मीही अर्ज भरेन. एकदा थेट आमनेसामने लढत होऊ द्या,” असे योगी म्हणाले. विरोधकांमध्ये थेट मुकाबला करण्याचे धाडस नसल्याची टीकाही त्यांनी केली.
योगी यांनी राम मंदिर आंदोलनाचा उल्लेख करत समाजवादी पक्षावर निशाणा साधला. रामभक्तांवर गोळीबार करणारे आता भगवान रामाची आठवण काढत असल्याचा आरोप त्यांनी केला. तसेच समाजवादी पक्ष आणि काँग्रेसवर गुंडगिरी, दंगली आणि माफियांना संरक्षण दिल्याचा आरोप केला.
या कार्यक्रमात योगी यांनी गोरखपूरमध्ये ४९१ कोटी रुपयांहून अधिक खर्चाच्या राज्यातील पहिल्या वानिकी आणि औद्यानिकी विद्यापीठाचे भूमिपूजन केले. तसेच ७९२ कोटी रुपयांहून अधिक खर्चाच्या ५५ विकासकामांचे उद्घाटन आणि भूमिपूजन केले.
मात्र, योगी आणि अखिलेश एकाच मतदारसंघातून निवडणूक लढवणार असल्याची अद्याप अधिकृत घोषणा झालेली नाही. योगी यांनी दिलेले हे आव्हान असून अखिलेश यादव यांची त्यावरील भूमिका आणि प्रत्यक्ष उमेदवारी याकडे राजकीय वर्तुळाचे लक्ष लागले आहे.





