Yogi Adityanath – दोन दिवसांपूर्वी देशाचे पंतप्रधान नरेंद्र मोदींनी महाराष्ट्र दौरा केला. या दौऱ्यादरम्यान त्यांनी नाशिकमधील रामकुंड येथे जलपूजन केल्यानंतर काळाराम मंदिरात दर्शन घेतले. तसेच काळा राम मंदिरात स्वच्छता मोहीम राबवली. काळा राम मंदिरात पूजा, आरती करण्याआधी त्यांनी स्वच्छता मोहीम राबवली. हातात झाडू घेऊन त्यांनी स्वतः स्वच्छता केली. तसेच देशातील सर्वच मंदिरांमध्ये स्वच्छता मोहीम राबवण्याचे आवाहन देखील यावेळी पंतप्रधान मोदी यांनी आपल्या भाषणातून केले. त्यामुळे या मोहिमेला भाजपचे सर्व कार्यकर्ते योगदान देत आहेत. उत्तर प्रदेशचे मुख्यमंत्री योगी आदित्यनाथ यांच्या हस्ते आज अयोध्येतील स्वच्छता मोहिमेला प्रारंभ झाला. ही मोहीम 21 जानेवारीपर्यंत चालणार आहे. योगी आदित्यनाथ यांनी अयोध्येतील लता मंगेशकर चौकातून स्वच्छ तीर्थ मोहिमेचा शुभारंभ केला. स्वच्छता अभियानासाठी आलेल्या महापालिकेच्या सफाई वाहनांना त्यांनी हिरवा झेंडा दाखवला. यानंतर लता चौकात स्वच्छता मोहीम राबविण्यात आली. हाताने कचरा उचलून कचराकुंडीत टाकत शहरातील नागरिकांना स्वच्छतेचा संदेश दिला. जनता अवध इंटर कॉलेज, शिवदयाल जैस्वाल इंटर कॉलेज, महाराजा इंटर कॉलेज आणि महाराजा पब्लिक स्कूलमधील 400 मुलांनीही स्वच्छता मोहिमेत सहभाग घेतला. मुख्यमंत्री योगी यांनी शाळकरी मुले आणि स्वच्छता कर्मचार्यांशीही संवाद साधला आणि त्यांना सांगितले की, अयोध्या स्वच्छ करण्यासाठी तुम्हा सर्वांना पुढे येऊन आपली जबाबदारी पार पाडावी लागेल. 30 डिसेंबर रोजी पंतप्रधान नरेंद्र मोदी यांनी ‘स्वच्छ मोहल्ला, स्वच्छ गाव, अयोध्या धाम, जय श्री राम’चा नारा दिला होता आणि देशातील जनतेला स्वच्छता अभियानात सहभागी होण्याचे आवाहन केले होते. अयोध्येत होणाऱ्या प्राणप्रतिष्ठा कार्यक्रमाच्या पहिल्या 11 दिवसांचे विधी पंतप्रधान मोदी करत असून देशातील मंदिरांमध्ये स्वच्छता मोहीम राबवण्याचे आवाहन मुख्यमंत्री योगी यांनी केले.
