Nayyi Navelli Box Office : अभिनेत्री यामी गौतम पुन्हा एकदा वेगळ्या धाटणीच्या चित्रपटातून प्रेक्षकांच्या भेटीला आली आहे. तिचा ‘नयी नवेली’ हा हॉरर-कॉमेडी चित्रपट १६ ऑक्टोबर रोजी चित्रपटगृहांमध्ये प्रदर्शित झाला. भयपट आणि विनोदाची अनोखी सांगड घालणाऱ्या या चित्रपटातील यामीच्या भूमिकेची सध्या चर्चा होत आहे. मात्र, चित्रपटाला पहिल्याच दिवशी बॉक्स ऑफिसवर अपेक्षेप्रमाणे प्रतिसाद मिळाला नसल्याचे समोर आलेल्या आकडेवारीवरून दिसते.

पहिल्या दिवशी किती कमाई?

‘नयी नवेली’ने बॉक्स ऑफिसवर संथ सुरुवात केली आहे. मीडिया रिपोर्ट्सनुसार, चित्रपटाने पहिल्या दिवशी देशभरातील ६,२८१ शोमधून सुमारे ३.२५ कोटी रुपयांची निव्वळ कमाई केली. भारतातील एकूण कमाई ३.८३ कोटी रुपये, तर परदेशातील कमाई सुमारे ७५ लाख रुपये असल्याचे सांगितले जात आहे. त्यामुळे चित्रपटाचे जगभरातील एकूण कलेक्शन सुमारे ४.५८ कोटी रुपयांवर पोहोचले आहे.

पहिल्या दिवसाच्या या आकडेवारीनंतर आता वीकेंडमध्ये चित्रपटाच्या कमाईत किती वाढ होते, याकडे चित्रपटप्रेमी आणि चित्रपट विश्लेषकांचे लक्ष लागले आहे. प्रेक्षकांचा प्रतिसाद आणि आगामी दिवसांतील कमाई यावर चित्रपटाची बॉक्स ऑफिसवरील वाटचाल अवलंबून असेल.

काय आहे ‘नयी नवेली’चे कथानक?

‘नयी नवेली’मध्ये यामी गौतमने नववधूची भूमिका साकारली आहे. लग्नानंतर ती सासरी राहायला येते; मात्र तिथे तिच्यासमोर अनपेक्षित परिस्थिती निर्माण होते. यामीच्या व्यक्तिरेखेकडे तिच्या सासरच्या मंडळींकडून संशयाने पाहिले जाते. ती चेटकीण असल्याचा संशय घेतला जातो आणि त्यातून अनेक विचित्र, गंमतीशीर तसेच भय निर्माण करणारे प्रसंग घडतात.

या चित्रपटात अभिनेता आदिनाथ कोठारे याने यामीच्या पतीची भूमिका साकारली आहे. हॉरर आणि कॉमेडीचा मिलाफ असलेल्या या चित्रपटातून प्रेक्षकांना मनोरंजनाचा वेगळा अनुभव देण्याचा प्रयत्न करण्यात आला आहे. आता ‘नयी नवेली’ला येत्या दिवसांत प्रेक्षकांचा कसा प्रतिसाद मिळतो आणि बॉक्स ऑफिसवरील कमाईत किती वाढ होते, हे पाहणे महत्त्वाचे ठरणार आहे.

Family Relationships: घरात रोज छोट्या-छोट्या गोष्टींवरून भांडणं होतात? तुमच्याही ‘या’ ६ चुका नात्यांमध्ये वाढवत असतील कटुता!