Yami Gautam Birthday: बॉलिवूडमधील साध्या-सोप्या व्यक्तिमत्त्वामुळे प्रेक्षकांच्या मनात घर करणारी यामी गौतम आज एक यशस्वी अभिनेत्री म्हणून ओळखली जाते. पण मजेशीर गोष्ट म्हणजे, यामीला लहानपणापासून कधीच अभिनेत्री व्हायचं नव्हतं. तिचं एकच स्वप्न होतं ते म्हणजे IAS ऑफिसर बनून देशाची सेवा करण्याचं. 28 नोव्हेंबरला जन्मलेल्या यामी गौतमचा वाढदिवस आज साजरा होत आहे. बिलासपूर (हिमाचल प्रदेश) येथे जन्मलेल्या आणि चंदीगडमध्ये वाढलेली यामी लहानपणी अत्यंत लाजाळू, संकोची आणि स्टेज फोबिया असलेली मुलगी होती. शाळेतील सांस्कृतिक कार्यक्रमांपासून ती नेहमी दूर राहायची. त्यामुळे तिच्या कुटुंबालाही कधी वाटलं नव्हतं की यामी एके दिवशी रुपेरी पडद्यावर चमकेल. फिल्मी प्रवासाची सुरुवात यामीच्या आयुष्यातील खरा टर्निंग पॉईंट तेव्हा आला, जेव्हा तिच्या वडिलांच्या मित्राच्या पत्नीने यामीतील ‘अभिनेत्री’ पाहिली. त्यांनी केवळ तिचं कौतुकच केलं नाही, तर तिचे फोटो थेट मुंबईतील एका प्रोडक्शन हाऊसला पाठवले. आणि इथूनच यामीच्या आयुष्यात अभिनयाचे दार उघडले. यामीने सुरुवातीला मॉडेलिंग आणि टीव्ही जाहिरातींमध्ये काम केलं. त्यानंतर काही मालिकांमध्ये काम करत तिचा आत्मविश्वास वाढला आणि तिचा फिल्मी प्रवास सुरू झाला. बॉलिवूड डेब्यू – ‘विकी डोनर’ 2012 मध्ये आयुष्मान खुरानासोबत यामी गौतमने ‘विकी डोनर’ या चित्रपटातून धमाकेदार बॉलिवूड डेब्यू केला. हा चित्रपट सुपरहिट ठरला आणि यामी रातोरात देशभर चर्चेत आली. यानंतर तिने कधीही मागे वळून पाहिलं नाही. यामीच्या प्रभावी भूमिका यामी गौतमने विविधतेने भरलेल्या भूमिका साकारून प्रेक्षक आणि समीक्षक दोघांचंही मन जिंकलं. तिच्या काही उल्लेखनीय चित्रपटांमध्ये, काबिल, उरी: द सर्जिकल स्ट्राइक, बाला, ए थर्सडे, दसवी, आर्टिकल 370 या चित्रपटांचा समावेश होतो. अलीकडेच यामी गौतम इमरान हाशमीसोबत ‘हक’ या चित्रपटात दिसली, ज्यात तिच्या दमदार अभिनयाचं पुन्हा एकदा कौतुक झालं. एका संकोची, लाजऱ्या मुलीपासून ते बॉलिवूडच्या लोकप्रिय अभिनेत्रीपर्यंतचा यामी गौतमचा प्रवास प्रेरणादायी आहे. IAS अधिकारी बनण्याचं स्वप्न जरी अपूर्ण राहिलं, तरी अभिनयाच्या माध्यमातून लोकांच्या हृदयात जागा बनवण्याचं स्वप्न तिने सुंदरपणे पूर्ण केलं.
