Petrol Diesel Prices: इराणमधील युद्धजन्य परिस्थितीमुळे जागतिक बाजारपेठेत कच्च्या तेलाच्या किमतींनी उच्चांक गाठला आहे. याचा थेट परिणाम सर्वसामान्यांच्या खिशावर होत असून, जगभरातील अनेक देशांमध्ये इंधन दरवाढीने हाहाकार माजवला आहे. पाकिस्तानसारख्या देशांत तर डिझेल आणि पेट्रोलच्या किमतींनी सर्व मर्यादा ओलांडल्या आहेत.

पाकिस्तानमध्ये इंधनाचा भडका –

युद्धाच्या सावटाखाली असलेल्या पाकिस्तानमध्ये इंधनाच्या किमतीत मोठी वाढ करण्यात आली आहे. येथे डिझेलच्या दरात ५४.९% ची वाढ होऊन आता किंमत ५२०.३५ पाकिस्तानी रुपये ($१.८८) प्रति लिटरवर पोहोचली आहे. तर पेट्रोल ४२.७% ची वाढ झाली असून नवीन दर ४५८.४० पाकिस्तानी रुपये इतका आहे.

जगातील सर्वात महाग पेट्रोल कुठे?

या यादीत हॉन्ग कॉन्ग पहिल्या क्रमांकावर आहे. येथील पेट्रोलच्या किमती इतक्या जास्त आहेत की केवळ ८.४% लोकांकडे स्वतःची कार आहे.

देश	किंमत (प्रति लिटर डॉलरमध्ये)
हॉन्ग कॉन्ग	$४.१
मलावी	$२.८६
नेदरलँड्स	$२.७४
डेन्मार्क	$२.६६
सिंगापूर	$२.५५
जर्मनी	$२.४२
लिकटिनस्टाइन	$२.४१
अल्बानिया	$२.३९
ग्रीस	$२.३६
नॉर्वे	$२.३६

हॉन्ग कॉन्ग आपले ८०% तेल चीनमधून आयात करते. मात्र, चीनमध्ये पेट्रोलचे दर हॉन्ग कॉन्गच्या तुलनेत एक तृतीयांश असल्याने अनेक लोक तिथे पेट्रोल भरण्यासाठी जातात.

सर्वात स्वस्त पेट्रोल देणारे देश –

युद्ध सुरू असूनही इराणमध्ये जगातील सर्वात स्वस्त पेट्रोल मिळत आहे. इराण हा जगातील प्रमुख तेल उत्पादक देशांपैकी एक असल्याने तिथे दर अत्यंत कमी आहेत.

१. इराण: अवघ्या $०.०२९ (सुमारे २.५० रुपये) मध्ये एक लिटर पेट्रोल मिळते.
२. वेनेझुएला: येथे पेट्रोलची किंमत $०.०३५ प्रति लिटर आहे. या देशाकडे जगातील सर्वात मोठा तेल साठा आहे.
३. इतर देश: लिबिया, अंगोला, इजिप्त आणि अल्जेरियामध्येही पेट्रोलचे दर खूप कमी आहेत.

भारतातील स्थिती –

जगातील या मोठ्या चढ-उतारांच्या दरम्यान, भारताची राजधानी नवी दिल्लीत पेट्रोलचा दर ९४.७७ रुपये आणि डिझेलचा दर ८७.६७ रुपये प्रति लिटर इतका आहे.