बारामती: शहरातील शारदा प्रांगणात बारामती नगरपालिका यांच्या वतीने महिला आर्थिक विकास महामंडळ आयोजित महिला बचत गट उत्पादित वस्तूंच्या जिल्हास्तरीय वस्तूंचे भव्य प्रदर्शनाचे आयोजन करण्यात आले होते. या प्रदर्शनात महिलांनी आपला उत्स्फुर्त सहभाग नोंदविला होता. मात्र, या प्रदर्शनाचे उद्घाटन दोन वेळा करण्यात आले आहे. राज्य महिला आयोगाच्या अध्यक्षा रुपाली चाकणकर आणि बारामती लोकसभेच्या खासदार सुप्रिया सुळे या दोघींनीही या प्रदर्शनाचे उद्घाटन केले आहे. या उद्घाटनावरून श्रेयसाठीची लढाई सुरू झाल्याची चर्चा स्थानिक नागरिकांत रंगू लागली आहे.

महिला आयोगाच्या अध्यक्षा रूपाली चाकणकर यांच्या हस्ते प्रदर्शनाचे उद्घाटन झाले आणि काही काळानंतर बारामतीच्या खासदार सुप्रिया सुळे यांच्या हस्ते या प्रदर्शनाचे उद्घाटन करण्यात आले. बारामतीकरांनी मला निमंत्रित केलं होतं, म्हणून मी या प्रदर्शनाच्या उद्घाटनासाठी आले, बाकी मला माहित नाही, अशी प्रतिक्रिया रुपाली चाकणकर यांनी माध्यमांशी बोलताना दिली. तसेच मी वेळेवर आले आणि उद्घाटन केले, मात्र माझ्यानंतर कोणी केव्हा आले आणि उद्घाटन कोणी कुणी केले हे बाकी मला माहीत नाही, याबाबत तुम्ही प्रशासनाला विचारा असे देखील त्या म्हणाल्या. यातून त्यांनी सुप्रिया सुळे यांच्या नावाचा उल्लेख करणे टाळले.

मला बचत गटाच्या उद्घाटनासाठी दुपारी चारची वेळ देण्यात आली होती, याबाबतची माहिती कृपया आपण प्रशासनाला विचारावी, मी स्थानिक खासदार म्हणून मला दुपारी चारची वेळ देण्यात आली असल्यामुळे मी दुपारी चार वाजता उद्घाटनासाठी आले आहे, अशी प्रतिक्रिया खासदार सुप्रिया सुळे यांनी दिली. या प्रदर्शनाचे उद्घाटन दोन वेळा झाले असेल तर मला ही प्रशासनाला याबाबत विचारणा करावीच लागणार आहे, असे देखील सुळे यावेळी बोलताना म्हणाल्या.

बारामतीनगर परिषद बारामती यांच्या संयुक्त विद्यमाने माविम सुवर्ण महोत्सवी वर्षानिमित्त व नवतेजस्विनी महाराष्ट्र ग्रामीण महिला उद्यम विकास प्रकल्पा अंतर्गत “नवतेजस्विनी जिल्हास्तरीय महोत्सव २०२५“ महिला बचत गट उत्पादित वस्तूंचे प्रदर्शन व विक्री महोत्सव पार पडला. आयोजन केले होते. या महोत्सवात बचत गटातील महिलांनी तयार केलेले घरगुती मसाले, विविध दुग्धजन्य पदार्थ विविध प्रकारच्या डाळी, गृहपयोगी वस्तू, वस्त्र, सौंदर्य प्रसाधने आदींची स्टॉल लावण्यात आले.