शिवांजली सखी मंचचा महत्त्वाकांक्षी उपक्रम: सलग दुसऱ्या वर्षी भव्य जत्रेचे आयोजन

पिंपरी – आमदार महेश लांडगे यांच्या संकल्पनेतून आणि शिवांजली सखी मंचच्या पुढाकाराने भोसरी विधानसभा मतदार संघाअंतर्गत “इंद्रायणी थडी’ जत्रेचे नियोजन करण्यात आले आहे. “महिला सक्षमीकरण’ साठी हक्काचे व्यासपीठ निर्माण करण्याचा संकल्प यानिमित्ताने करण्यात आला आहे.

या जत्रेच्या यामाध्यमातून कला, क्रीडा, उद्योजकता यांसह महिला सक्षमीकरणाचा जागर करण्यात येणार आहे. “महिला सुरक्षा आणि सन्मान’ अशी जत्रेची थीम आहे. नवीन वर्षात म्हणजेच 30 व 31 जानेवारी आणि 1 व 2 फेब्रुवारी 2020 अशी चार दिवस सकाळी 10 ते रात्री 10 ही जत्रा कै. अंकुशराव लांडगे नाट्यगृहाशेजारील गावजत्रा मैदानावर सुरू राहणार आहे, अशी माहिती शिवांजली सखी मंचच्या साक्षी लांडगे यांनी प्रसिद्धीपत्रकाद्वारे दिली आहे.

जत्रेच्या नियोजनात आमदार लांडगे यांच्या पत्नी पूजा लांडगे आणि कन्या साक्षी लांडगे यांनी पुढाकार घेतला आहे. त्याद्वारे अधिकाधिक महिला बचत गटांना सहभागी करुन घेण्याचे नियोजन केले आहे. इंद्रायणी थडीचे हे दुसरे वर्ष आहे. परिसरातील अधिकाधिक महिला बचत गटांनी जत्रेत सहभागी व्हावे, हा हेतू आहे. स्टॉल बुकिंग आणि वाटपाचे नियोजन अंतिम टप्प्यात आहे. अधिक माहितीसाठी शितलबाग, भोसरी येथील आमदार महेश लांडगे यांच्या जनसंपर्क कार्यालयात संजय पटनी (9822217163 ) यांच्याशी संपर्क साधावा, असे आवाहन करण्यात आले आहे. कोणत्याही ब्रॅंडेड वस्तुंची विक्री करण्यासाठी स्टॉल उपलब्ध होणार नाहीत, असेही संयोजकांनी निश्‍चित केले आहे.

800 स्टॉल, 1300 हून अधिक अर्ज
‘इंद्रायणी थडी’ जत्रेत एकूण 8 टेंट उभारण्यात येणार आहे. त्यामध्ये एकूण 800 स्टॉल लावण्यात येतील. त्यासाठी आतापर्यंत 1300 हून अधिक फॉर्म जमा झाले आहेत. अर्जांची छाननी करुन स्टॉल वाटप केले जाणार आहे, अशी माहिती नियोजन समितीचे समन्वयक संजय पटनी यांनी दिली.