पिंपरी – दहीहंडीचा उत्सव संपल्यानंतर स्टेजची कमान उतरविण्याचे काम सुरू होते. त्याचवेळी लोखंडी अँगल अंगावर पडून एका महिलेचा दुर्दैवी मृत्यू झाला. जुनी सांगवीतील विघ्नहर्ता दहीहंडी मंडळाच्या आवारात शुक्रवारी (दि. ४ सप्टेंबर) रात्री पावणेअकराच्या सुमारास ही घटना घडली.

सलमा सलाउद्दीन पठाण (वय ४५) असे मृत महिलेचे नाव आहे. या घटनेनंतरही संबंधित आयोजकांविरुद्ध गुन्हा दाखल झालेला नाही. त्यामुळे उत्सवाच्या आयोजनातील सुरक्षेवर प्रश्नचिन्ह निर्माण झाले आहे. सलमा पठाण या पतीसोबत दहीहंडीचा कार्यक्रम पाहण्यासाठी गेल्या होत्या.

कार्यक्रम संपल्यानंतर दोघेही घरी जाण्यासाठी निघाले. त्याचवेळी मंडपाची कमान काढण्याचे काम सुरू होते. अचानक लोखंडी अँगल कोसळला. तो सलमा यांच्या अंगावर पडला. त्या गंभीर जखमी झाल्या. त्यांना तातडीने औंध रुग्णालयात नेण्यात आले. मात्र, डॉक्टरांनी उपचारापूर्वीच त्यांना मृत घोषित केले.

४१ अटींची नोटीस, तरी सुरक्षेचा फज्जा?
कार्यक्रमासाठी सांगवी पोलिसांनी संबंधित मंडळाला ४१ अटी व शर्तींची नोटीस दिली होती. स्टेजची सुरक्षितता, वाहतुकीला अडथळा होणार नाही याची काळजी आणि ध्वनीप्रदूषणासह विविध बाबींचा त्यात समावेश होता.

मात्र, कार्यक्रमानंतर कमान उतरविताना झालेल्या दुर्घटनेने या अटींच्या अंमलबजावणीवरच प्रश्न उपस्थित केला आहे. विशेष म्हणजे संबंधित मंडळ नोंदणीकृत नसल्याचे पोलिसांनी सांगितले आहे. तरीही कार्यक्रमासाठी परवानगीची प्रक्रिया झाली.

तक्रार नसल्याने गुन्हा नाही
मयत महिलेच्या कुटुंबीयांकडून घटनेबाबत तक्रार करण्यात आली नसल्याचे पोलिसांचे म्हणणे आहे. त्यामुळे गुन्हा दाखल करण्यात आलेला नाही.

मात्र, दुर्घटनेमागे नेमकी निष्काळजी कोणाची होती, याचा तपास होणे आवश्यक आहे. एका महिलेचा जीव गेला आहे. प्रशासनाने या घटनेची सखोल चौकशी करून दोष आढळल्यास संबंधितांवर कारवाई करावी, अशी मागणी होत आहे.

‘ स्टेजची कमान काढताना लोखंडी अँगल अंगावर पडून एका महिलेचा मृत्यू झाला आहे. मयत महिलेचा मुलगा संबंधित मंडळाचा कार्यकर्ता आहे. त्यांची घटनेबाबत कोणतीही तक्रार नाही. त्यामुळे गुन्हा दाखल केला नाही. पोलीस तपास करत आहेत. तसचे संबंधित मंडळ नोंदणीकृत नाही. ते कार्यक्रमाची परवानगी घ्यायला आले तेव्हा तेंव्हा अटी, शर्तींची नोटीस दिली होती.’- जितेंद्र कोळी, वरिष्ठ निरीक्षक, सांगवी पोलीस ठाणे

Pune District : युवा पिढीच्या हाती तंटामुक्ती समितीचे अध्यक्षपद