थेऊर, (वार्ताहर) –घराच्या सुरू असलेल्या बांधकामावर पाणी मारताना महिलेला विद्युत वाहिनीचा शॉक लागल्याची धक्कादायक घटना थेऊर (ता. हवेली) येथे मंगळवारी (दि. 27) दुपारी तीन वाजण्याच्या सुमारास घडली. या घटनेत जखमी झालेल्या महिलेचा उपचारादरम्यान मृत्यू झाला आहे. आशा विठ्ठल अवसरे (वय 36, महादेव मंदिराजवळ, काकडे मळा, थेऊर, ता. हवेली) असे मृत्यू झालेल्या महिलेचे नाव आहे. आशा अवसरे यांच्या दोन मजली घराचे बांधकाम मागील काही दिवसांपासून सुरू होते. आशा या दररोज बांधकामावर पाणी मारत असत. नेहमीप्रमाणे आशा या मंगळवारी दुपारी अडीच वाजण्याच्या सुमारास घराच्या बांधकामावर पाणी मारत होत्या. घराच्या बांधकामावर पाणी मारल्यानंतर आशा या टेरेसवर पाणी मारण्यासाठी गेल्या होत्या. टेरेसवर पाणी मारताना त्यांच्या घराजवळून गेलेल्या 22 हजार केव्ही क्षमतेच्या विद्युत प्रवाहाच्या तारांचा शॉक बसला आणि आशा या दोन मजली बिल्डिंगवरून खाली कोसळल्या. या अपघातात आशा या गंभीर जखमी झाल्या. दरम्यान, आशा यांना तातडीने लोणी काळभोर येथील एका रुग्णालयात उपचारासाठी दाखल करण्यात आले. मात्र, त्यांची प्रकृती खालावल्याने त्यांना पुढील उपचारासाठी पुण्यातील एका हॉस्पिटलमध्ये दाखल करण्यात आले. बुधवारी सकाळी उपचारादरम्यान आशा यांची प्राणज्योत मालवली. याप्रकरणी लोणी काळभोर पोलीस ठाण्यात गुन्हा नोंद करण्यात आला आहे. पुढील तपास लोणी काळभोर पोलीस ठाण्याचे हवालदार विजय जाधव करीत आहेत.
