रायगड : श्रीवर्धन नगरपालिकेत ठाकरेसेनेचे नगराध्यक्षपदाचे उमेदवार अतुल चौगुले विजयी झाले आहेत. मात्र, विजयी झाल्यानंतर काही वेळातच ते शिंदेसेनेत प्रवेश करणार असल्याची माहिती आहे. यामुळे राजकीय वर्तुळात चर्चेला सुरूवात झाली आहे. अतुल चौगुले विजयी झाल्यानंतर शिंदेसेनेचे आमदार भरत गोगावले यांनी श्रीवर्धनला पोहोचत अतुल चौगुले यांचे अभिनंदन केले आहे. त्यानंतर दोन्ही शिवसेनेचे कार्यकर्ते एकत्रित जल्लोष करताना पहायला मिळाले. अतुल चौगुले यांनी विजयी झाल्यानंतर गोगावले यांचे जाहीरपणे आभार मानले आहेत. माझ्या विजयात भरत गोगावले यांचा मोठा वाटा आहे. त्यांनी मला सहकार्य केले. हे शिवसेना ठाकरे पक्ष आणि शिंदे पक्षाच्या तळागाळातील कार्यकर्त्यांचे यश आहे. श्रीवर्धनमधील लढाई ही धनशक्ती विरुद्ध जनशक्ती अशी होती. या निवडणुकीत कोट्यवधी रुपये खर्च करण्यात आले होते. पण श्रीवर्धनच्या जनतेने हे नाकारले. दोन्ही शिवसेना, काँग्रेस, शरद पवार पक्ष, शेकाप आणि अजित पवार गटातील असंतुष्टांनी मला मदत केली आहे, असे चौगुले यांनी म्हटले आहे. याबाबत भरत गोगावलेंनी माध्यमांशी बोलताना सांगितले की, अतुल चौगुले हे शिवसेनेत प्रवेश करणार नाहीत. पण त्यांची मानसिकता शिवसेनेसोबत काम करण्याची आहे. शिवसेनेने त्यांना श्रीवर्धनमध्ये ताकदीने मदत केली आहे. ती मदत ते आयुष्यभर विसरणार नाहीत. आम्ही गनिमी काव्याने युद्ध केले. त्या युद्धात आमचा जय झाला, असे गोगावले यांनी म्हटले आहे.
