Maharashtra Politics : महानगरपालिका निवडणुकांच्या निमित्ताने राज्यातील राजकीय वातावरण सध्या चांगलंच तापलं आहे. असं असताना काँग्रेसचे ज्येष्ठ नेते विजय वडेट्टीवार यांनी एक मोठा दावा केला आहे. चंद्रपुरात माध्यमांशी बोलताना त्यांनी म्हटले की, उद्योगपती गौतम अदानी यांच्या मध्यस्थीने शरद पवार हे लवकरच एनडीएमध्ये सामील होऊ शकतात. पंतप्रधान नरेंद्र मोदी यांना लोकसभेत खासदारांची गरज आहे, तर शरद पवार यांच्याकडेही आमदारांची संख्या कमी आहे. याशिवाय, पुणे आणि पिंपरी-चिंचवड महानगरपालिका निवडणुकीसाठी शरद पवार आणि अजित पवार यांच्या दोन्ही राष्ट्रवादी गटांमध्ये तात्पुरती युती झाल्याने एकत्रीकरणाची पहिली पायरी पूर्ण झाली असल्याचे वडेट्टीवार म्हणाले. या दाव्याला आधार देणारी महत्त्वाची घटना म्हणजे नुकतेच बारामतीत झालेल्या कार्यक्रमात गौतम अदानी यांनी शरद पवार यांना आपले मार्गदर्शक असल्याचे जाहीर केले. AI सेंटरच्या उद्घाटनावेळी अदानींनी पवार यांच्या दूरदृष्टीचे कौतुक केले आणि बारामतीला विकासाचे मॉडेल बनवण्यात त्यांचा मोठा वाटा असल्याचे सांगितले. या कार्यक्रमात अजित पवार आणि सुप्रिया सुळे यांच्यासह पवार कुटुंबीय उपस्थित होते. दरम्यान, महापालिका निवडणुकीच्या तयारीत शरद पवार आणि अजित पवार यांच्या गटांमध्ये पुणे आणि पिंपरी-चिंचवडसाठी युती झाली आहे. पिंपरी-चिंचवडमध्ये दोन्ही गट एकत्र लढणार असून पुण्यातही जागावाटपाची चर्चा पूर्ण झाली आहे. ही युती फक्त निवडणुकीपुरती मर्यादित आहे की त्याचा विस्तार होईल, यावरून अनेक अंदाज लावले जात आहेत. वडेट्टीवार यांच्या दाव्याने खळबळ वडेट्टीवार यांच्या या दाव्याने महाराष्ट्राच्या राजकीय वर्तुळात मोठी खळबळ उडाली आहे. यापूर्वीही शिंदे गटाचे मंत्री संजय शिरसाट यांनी शरद पवार NDA मध्ये येऊ शकतात, असा दावा केला होता. मात्र, शरद पवार गटाकडून अद्याप याबाबत कोणतीही अधिकृत प्रतिक्रिया आलेली नसून भविष्यात नेमकं काय घडणार हे पाहणं महत्वाचं ठरणार आहे.
