मुंबई- माझा होशील ना मालिकेतील आदित्य सध्या द्वीधा मनस्थितीत अडकला आहे. त्यात मालिकेत नवी एन्ट्री होणार आहे. सौ.सिंधु जगदिश ब्रह्मे असं या पात्राचं नाव आहे. या एन्ट्रीवरुन  दादा मामाचा भूतकाळाबद्दल अनेकांना कळण्याची शक्यता आहे.

आदित्यला आजवर त्याचं आणि सईचं नेमकं नातं काय हे समजतं नव्हतं. आपण फक्त चांगले मित्र आहोत ह्याच भ्रमात आदित्य होता, पण आता ह्या गुरुवारी दिसणाऱ्या भागात आदित्यला त्याच्या सईवर असलेल्या प्रेमाची तीव्र जाणीव होणार आहे. बंधूमामासमोर आदित्य त्याच्या प्रेमाची कबूली देणार आहे. आणि बंधूमामाच्या आग्रहावरुन लगेच सईला भेटून मनातली गोष्ट देखील सांगणार आहे. पण आदित्यचं सईवर असलेलं प्रेम सईपर्यंत पोहोचेल का? ते समजल्यावर त्या दोघांचं नातं कुठलं वळण घेईल हे पाहणं रंजक ठरेल.

ब्रह्मे कुटुंबात आदित्य आणि त्याचे चार मामा, आप्पा राहत आलेत. बाईविना चालणारं हे घर आजवर प्रेक्कांनी पाहिलेलं आहे. ह्या घरातल्या कुठल्याच मामाचं लग्न झालेलं नाही असं आजवर आदित्यला आणि प्रेक्षकाना वाटत होतं, पण आता दादा ब्रह्मेचा भूतकाळ बाहेर येणार असून दादाची लग्नाची, पण टाकलेली बायको, सौ. सिंधु जगदिश ब्रह्मे दादाच्या आयुष्यात परत येणार आहे आणि त्याचबरोबर धोका निर्माण होणार आहे, लपवलेली अनेक गुपितं बाहेर येण्याचा!

माझा होशील ना ह्या मालिकेत सिंधु ब्रह्मे म्हणून कोणती कलाकार काम करणार हे जरी अजून गुलदस्त्यात ठेवलेलं असलं तरी सिंधूच्या येण्याने हिवाळ्यात वातावरण तापणार आहे, या एन्ट्रीनंतर नेमकं काय घडणार हे पाहणं महत्वाचं ठरणार आहे.