Sahar Shaikh : ठाणे महानगरपालिका निवडणुकीच्या पार्श्वभूमीवर एमआयएम पक्षाच्या नगरसेविका सहर शेख आपल्या ‘संपूर्ण मुंब्रा हिरवा करू’ या वक्तव्यामुळे चर्चेत आली होती. या विधानावरून मोठा वाद निर्माण झाला होता. त्यानंतर तिचे वडील युनूस शेख यांनीही जाहीर भाषणातून आक्रमक भूमिका मांडली होती.

दरम्यान, काही दिवसांपूर्वी सोशल मीडियावर युनूस शेख यांचा गळ्यात भगवे उपरणे घातलेला फोटो व्हायरल झाला. त्यांची शिंदेसेनेच्या कळवा-मुंब्रा केबल सेनेच्या अध्यक्षपदी नियुक्ती झाल्याची माहिती समोर आल्यानंतर त्यांनी शिवसेनेत प्रवेश केल्याची चर्चा सुरू झाली. मात्र, या चर्चेवर स्पष्टीकरण देताना, “मला केबल सेनेचे पद मिळाले आहे; मात्र मी शिवसेनेत प्रवेश केलेला नाही,” असे युनूस शेख यांनी स्पष्ट केले.

या घडामोडीनंतर आता सहर शेख हिच्या नव्या वक्तव्यामुळे पुन्हा राजकीय चर्चांना उधाण आले आहे. हिंदू-मुस्लिम राजकारण होऊ नये, अशी अपेक्षा व्यक्त करत तिने शिवसेना हा हिंदुत्ववादी पक्ष असल्याचे आपल्याला वाटत नसल्याचे मत मांडले. तसेच “आता हिरवा आणि भगवा दोन्ही करू,” असे वक्तव्यही तिने केले आहे. या नव्या वक्तव्यामुळे सहर शेख पुन्हा एकदा चर्चेत आली आहे.

‘शिवसेना हिंदुत्ववादी पक्ष असल्याचे मला वाटत नाही’

“हिंदू-मुस्लिम राजकारण का केले जात आहे? शिवसेना हा हिंदुत्ववादी पक्ष आहे, असे बोलले जाते. मात्र, मला तसे अजिबात वाटत नाही. कारण आम्हाला तसे कधी कुणी जाणवू दिले नाही. जर तसे कुणी आम्हाला सांगितले असते, तर मी तुमच्या मताशी सहमत झाले असते.” असे सहर शेख म्हणाली.

यापूर्वी सहर शेख हिने संपूर्ण मुंब्रा हिरव्या रंगाने व्यापून टाकण्याची इच्छा व्यक्त केली होती. तिच्या या वक्तव्यावरून शिवसेना पक्षाने कडाडून विरोध केला होता. त्याच पक्षात तिची वडील युनूस शेख यांना पद मिळाल्याने अंतर्गत राजकारणाची चर्चा सुरू झाली आहे.

एका बाजूला सहर शेखची हिंदू-मुस्लिम राजकारणाबाबतची भूमिका आणि दुसरीकडे युनूस शेख यांची केबल सेनेच्या अध्यक्षपदी झालेली नियुक्ती, यामुळे या घडामोडींमागील राजकीय समीकरणांबाबत विविध प्रश्न उपस्थित केले जात आहेत.

Yoga For Women: महिलांनो, रोज करा ‘ही’ २ योगासनं! तणाव कमी करण्यापासून शरीराची लवचिकता वाढवण्यापर्यंत होतील फायदे