Wildlife Trafficking – वन्यप्राणी खवले मांजर यांच्या खवल्यांची तसेच सांबरांच्या शिंगांची तस्करी करणाऱ्या टोळीवर मंचर वनविभागाने मोठी कारवाई करत दोन जणांना अटक केली आहे. या प्रकरणी वन्यजीव संरक्षण अधिनियम १९७२ अंतर्गत गुन्हा दाखल करण्यात आला असून पुढील तपास सुरू आहे. वनपरिक्षेत्र अधिकारी, मंचर यांना सोमवार दि.१६ रोजी खवले मांजर व सांबर यांच्या अवयवांची तस्करी होणार असल्याची गोपनीय माहिती मिळाली होती.त्यानुसार वनविभागाच्या पथकाने सापळा रचून मंचर येथील मोरडे फुड्स कंपनीजवळील झडका खानावळीच्या मागील परिसरात पहारा ठेवला. दरम्यान, मारुती सुझुकी कंपनीची निळ्या रंगाची ‘स्विफ्ट डिझायर’ (एमएच ०४ डीव्हाय ३५६७) ही कार संशयितरित्या येताना दिसताच पथकाने तिला अडवले. झडतीदरम्यान कारमधून सुमारे ३ किलो वजनाचे खवले मांजराचे खवले, खवले मांजराचे ३ नखे तसेच सांबराची ४ शिंगे जप्त करण्यात आली.संबंधित वाहनासह मुद्देमाल ताब्यात घेण्यात आला. या प्रकरणी उदय शंकर सुर्वे (रा.शिस्ते, ता. श्रीवर्धन, जि. रायगड) व नवीन करीम खान (रा. वडवली, ता. श्रीवर्धन, जि. रायगड) या दोघांना अटक करण्यात आली आहे. त्यांच्याविरोधात वन्यजीव संरक्षण अधिनियम १९७२ च्या कलम १, ३९, ४८ व ५१ अन्वये वनपरिमंडळ मंचर येथे गुन्हा रजिस्टर क्र. ०९/२०२६ दाखल करण्यात आला आहे. खवले मांजर या आरोपींना सोमवार, दि.१६रोजी अटक करून मंगळवार दि. १७ रोजी प्रथम वर्ग न्यायालय, घोडेगाव येथे हजर करण्यात आले असता न्यायालयाने त्यांना जामीन मंजूर केला आहे. वनविभागाच्या माहितीनुसार, खवले मांजर व सांबर हे दोन्ही वन्यजीव संरक्षण अधिनियम १९७२ च्या अनुसूची-१ मध्ये समाविष्ट असून त्यांच्या शिकार, विक्री, खरेदी, अवैध वाहतूक किंवा व्यापार करणे हा गंभीर व अजामिनपात्र गुन्हा आहे. अशा गुन्ह्यांसाठी सात वर्षांपर्यंत कारावास व २५ हजार रुपयांपर्यंत दंडाची तरतूद आहे. या कारवाईत पुणे वनवृत्तचे वनसंरक्षक आशीष ठाकर व उपवनसंरक्षक प्रशांत खाडे यांच्या मार्गदर्शनाखाली परिक्षेत्रीय उपवनसंरक्षक लोकेश पाटील, सहाय्यक वनसंरक्षक अमृत शिंदे, मंचरचे वनपरिक्षेत्र अधिकारी विकास भोसले तसेच वनरक्षक रईस मोमीन, विवेक जगताप, शिवाजी ढोले, पूजा पवार, धकुली शिवशरण, वनपरिक्षेत्र मंचरचे इतर कर्मचारी यांनी सहभाग घेतला. “वन्यजीवांच्या अवयवांची खरेदी-विक्री, साठवण किंवा वाहतूक यांसारख्या बेकायदेशीर कृत्यांमध्ये कोणीही सहभागी होऊ नये.अशा प्रकारची माहिती मिळाल्यास तत्काळ वनविभागाशी संपर्क साधावा.” – विकास भोसले, वनपरिक्षेत्र अधिकारी, मंचर.
