रामचंद्र सोनवणे

राजगुरुनगर : शहरातील वाडा रोड परिसरातील संगम गार्डन येथे कौटुंबिक वादातून एका व्यक्तीने पत्नीचा गळा आवळून खून केल्याची धक्कादायक घटना उघडकीस आली आहे.

एवढ्यावरच न थांबता आईला वाचविण्यासाठी धावून आलेल्या १७ वर्षीय मुलाचा ओढणीने गळा आवळण्याचा प्रयत्न केले. तसेच त्याच्यावर चाकूने वार करून खुनाचा प्रयत्न केला. या प्रकरणी खेड पोलीस ठाण्यात पतीविरुद्ध खून, खुनाचा प्रयत्न व धमकी दिल्याप्रकरणी गुन्हा दाखल करण्यात आला आहे.

या घटनेत दीपा महेंद्र दौंडकर (वय ४०) यांचा मृत्यू झाला असून, त्यांचे पती महेंद्र शिवाजी दौंडकर (वय ४५) यांच्याविरुद्ध गुन्हा दाखल करण्यात आला आहे. ही घटना रविवारी (दि. ३०) सकाळी साडेनऊ ते साडेअकराच्या दरम्यान संगम गार्डन, वाडा रोड येथील त्यांच्या राहत्या घरी घडली. कौटुंबिक कारणातून घडलेल्या या दुर्दैवी घटनेमुळे खेड शहरात खळबळ उडाली आहे.

नेमकं प्रकरण काय? 

याबाबत मृत महिलेचा १७ वर्षीय मुलगा अर्थव महेंद्र दौंडकर याने खेड पोलीस ठाण्यात फिर्याद दिली आहे. त्यानुसार, आरोपी महेंद्र दौंडकर यांनी पत्नी दीपा या त्यांच्या बहिणीशी बोलत नसल्याच्या कारणावरून वाद घालत तिचा गळा आवळून खून केला.

फिर्यादी अर्थव हा आपल्या आईला उठविण्यासाठी बेडरूममध्ये गेला असता आरोपीने त्याचाही ओढणीने गळा दाबण्याचा प्रयत्न केला. त्यादरम्यान अर्थव आरडाओरडा करत घराबाहेर पडला, त्यावेळी आरोपीने त्याला “तुला चाकूने भोसकून टाकीन” अशी धमकी दिल्याचे फिर्यादीत म्हटले आहे. त्यानंतर त्याच्या उजव्या हाताच्या अंगठ्यावर चाकूने वार करत त्याच्याही खुनाचा प्रयत्न केल्याचा आरोप आहे.

या प्रकरणी खेड पोलीस ठाण्यात गुन्हा रजिस्टर क्रमांक ५२४/२०२६ अन्वये भारतीय न्याय संहिता (बीएनएस) कलम १०३(१), १०९(१), ३५२ नुसार सोमवारी (दि. ३१) सकाळी ६.४७ वाजता गुन्हा दाखल करण्यात आला आहे. या प्रकरणाचा अधिक तपास खेड पोलीस ठाण्याचे पोलीस निरीक्षक सुभाष चव्हाण करत आहेत.

हेही वाचा: 

Aamir Khan and Sonam Wangchuk: ‘३ इडियट्स’वरून आमिर खानला सोनम वांगचुकांचा टोला; “गजनीच्या भूमिकेमुळे शॉर्ट-टर्म मेमरी लॉस झाला असेल!”