लखनौ : बहुजन समाज पक्षाच्या प्रमुख मायावती यांनी शनिवारी वक्फ कायद्यावरून काँग्रेस नेते राहुल गांधींवर टीका केली. उत्तर प्रदेशच्या माजी मुख्यमंत्री असलेल्या मायावती यांनी त्यांच्या एक्स हँडलवर म्हटले आहे की, संसदेत झालेल्या दीर्घ चर्चेदरम्यान राहुल गांधी वक्फ (दुरुस्ती) विधेयकावर बोलले नाहीत. या मुद्द्यावर मुस्लिमांना राग येणे स्वाभाविक आहे.

लोकसभेत वक्फ दुरुस्ती विधेयकावरील प्रदीर्घ चर्चेदरम्यान विरोधी पक्षनेते राहुल गांधी यांनी काहीही न बोलणे योग्य आहे का? मुस्लिम समुदायात याबद्दलचा राग आणि त्यांच्या इंडिया आघाडीमध्ये अस्वस्थता स्वाभाविक आहे. दुसऱ्या एका ट्विटमध्ये मायावतींनी म्हटले की कोणत्याही परिस्थितीत, देशातील बहुजनांच्या हितासाठी आणि कल्याणासाठी सरकारी नोकऱ्या आणि शिक्षण इत्यादींमध्ये आरक्षणाचा अधिकार निष्क्रिय करून बहुजनांना वंचित ठेवण्याच्या बाबतीत काँग्रेस, भाजप हे दोन्ही पक्ष सारखेच दोषी आहेत.

धार्मिक अल्पसंख्याकांनीही त्यांच्या फसवणुकीपासून सावध राहणे गरजेचे आहे. अशा वृत्तीमुळे उत्तर प्रदेशातील बहुजनांची स्थिती प्रत्येक बाबतीत खूपच वाईट आणि दुःखद आहे, तर भाजप नेत्यांना कायदा हातात घेण्याची मुभा दिली गेली आहे. शिवाय, वीज आणि इतर सरकारी विभागांमधील वाढत्या खाजगीकरणामुळे परिस्थिती चिंताजनक आहे. सरकारने सार्वजनिक कल्याणाची आपली संवैधानिक जबाबदारी योग्यरित्या पार पाडली पाहिजे.

बसपा प्रमुखांनी गुरुवारी केंद्राला नवीन वक्फ कायद्यातील तरतुदींचा पुनर्विचार करावा आणि तो कायदा सध्या तरी स्थगित करावा असे आवाहन केले होते. मायावती म्हणाल्या की, अलिकडेच पारित झालेल्या कायद्यात वक्फ बोर्डात बिगर मुस्लिमांना समाविष्ट करण्याची तरतूद पहिल्या दृष्टीक्षेपात चांगली वाटत नाही.

केंद्राने मंगळवारी वक्फ (सुधारणा) कायदा, २०२५ अधिसूचित केला आहे व त्याला दोन्ही सभागृहांमध्ये जोरदार चर्चेनंतर संसदेने मंजूर केल्यानंतर ५ एप्रिल रोजी राष्ट्रपती द्रौपदी मुर्मू यांची मान्यता मिळाली. राज्यसभेत हे विधेयक १२८ विरूद्ध ९५ असे मंजूर झाले. लोकसभेत २८८ सदस्यांनी याला पाठिंबा दिला तर २३२ खासदारांनी विरोध केला.