Curved Display: काही वर्षांपूर्वी स्मार्टफोनच्या जगात कर्व्ह्ड डिस्प्ले हा प्रीमियम फीचर मानला जात होता. स्क्रीनच्या दोन्ही बाजू वाकलेल्या असल्यामुळे फोन अधिक आकर्षक, आधुनिक आणि भविष्यकालीन तंत्रज्ञानाचा भाग वाटायचा. सॅमसंग, वनप्लस, विवो आणि इतर अनेक कंपन्यांनी या डिझाइनचा मोठ्या प्रमाणात वापर केला होता.

मात्र, आता परिस्थिती पूर्णपणे बदलली आहे. आज बहुतेक स्मार्टफोन कंपन्या पुन्हा फ्लॅट म्हणजेच सरळ स्क्रीनकडे वळताना दिसत आहेत. त्यामुळे अनेकांच्या मनात प्रश्न निर्माण झाला आहे की, एकेकाळी भविष्याचं तंत्रज्ञान मानला गेलेला कर्व्ह्ड डिस्प्ले अचानक लोकप्रियतेतून का बाहेर पडला?

यामागे अनेक महत्त्वाची कारणं आहेत.

१. आकर्षक दिसणारा डिस्प्ले जास्त नाजूक ठरला   (Curved Display)

कर्व्ह्ड डिस्प्लेचं सर्वात मोठं नुकसान म्हणजे तो सहज खराब होण्याचा धोका जास्त असतो. फोन हातातून पडल्यास सर्वप्रथम त्याच्या वाकलेल्या कडा जमिनीवर आपटतात. त्यामुळे स्क्रीन तुटण्याची शक्यता फ्लॅट डिस्प्लेपेक्षा खूप जास्त असते. परिणामी, दुरुस्तीचा खर्चही वाढतो.

२. स्क्रीन प्रोटेक्टर बसवणं अवघड होतं   (Curved Display)

कर्व्ह्ड डिस्प्लेवर टेम्पर्ड ग्लास किंवा स्क्रीन प्रोटेक्टर व्यवस्थित बसत नाही. काही दिवसांनी त्याचे कडे उचलले जातात किंवा ते निघून जातात. यामुळे वापरकर्त्यांना स्क्रीनचं संरक्षण करणं कठीण जात होतं. अनेक ग्राहक या समस्येमुळे नाराज होते.

३. वारंवार होणारे चुकीचे टच त्रासदायक ठरले

कर्व्ह्ड डिस्प्लेची आणखी एक मोठी समस्या म्हणजे ‘अॅक्सिडेंटल टच’. फोन हातात धरताना नकळत बोटं किंवा तळहात स्क्रीनच्या वाकलेल्या भागाला स्पर्श करतात. त्यामुळे नको असलेले अॅप्स उघडणे, चुकीचे कमांड सक्रिय होणे किंवा अनावश्यक फंक्शन्स सुरू होणे अशा समस्या वारंवार निर्माण होत होत्या. दैनंदिन वापरात ही गोष्ट अनेकांसाठी डोकेदुखी ठरली.

४. उन्हात स्क्रीन नीट दिसत नव्हती

कर्व्ह्ड स्क्रीनमध्ये प्रकाश परावर्तित होण्याची समस्या मोठ्या प्रमाणात जाणवत होती. विशेषतः बाहेर किंवा सूर्यप्रकाशात फोन वापरताना स्क्रीनच्या वाकलेल्या भागावर प्रकाश पडून चमक निर्माण होत असे. त्यामुळे स्क्रीनवरील मजकूर आणि इतर माहिती स्पष्ट दिसत नव्हती. हा अनुभव अनेक वापरकर्त्यांसाठी त्रासदायक ठरत होता.

५. कंपन्यांनी ग्राहकांच्या पसंतीनुसार निर्णय बदलला

स्मार्टफोन उत्पादक कंपन्यांना हळूहळू लक्षात आलं की ग्राहक आता आकर्षक डिझाइनपेक्षा टिकाऊपणा, वापरण्यातील सोपेपणा आणि सुरक्षिततेला अधिक महत्त्व देत आहेत. त्यामुळे अनेक कंपन्यांनी फ्लॅट डिस्प्लेकडे परतण्याचा निर्णय घेतला. फ्लॅट स्क्रीन अधिक मजबूत, वापरण्यास सोपी आणि दुरुस्तीसाठी कमी खर्चिक असल्यामुळे ग्राहकांमध्ये त्याची मागणी पुन्हा वाढली आहे.

कर्व्ह्ड डिस्प्लेचं युग पूर्णपणे संपलं आहे का?

तसं मात्र नाही. काही कंपन्या अजूनही या तंत्रज्ञानाचा वापर करत आहेत. विशेषतः मोटोरोलाची एज सिरीज अजूनही कर्व्ह्ड डिस्प्लेसह उपलब्ध आहे. याशिवाय, तंत्रज्ञान क्षेत्रात अशीही चर्चा सुरू आहे की, ॲपल पुढील वर्षी येणाऱ्या iPhone 20 सिरीजमध्ये कर्व्ह्ड डिस्प्ले देऊ शकते. जर असं झालं, तर इतर अँड्रॉइड कंपन्याही पुन्हा या ट्रेंडकडे वळण्याची शक्यता नाकारता येत नाही.

सध्या मात्र स्मार्टफोन बाजारात फ्लॅट डिस्प्लेचाच दबदबा दिसून येत आहे.