जेजुरी : जिल्ह्यात सर्वांत लक्षवेधी ठरलेल्या जेजुरी नगरपालिका निवडणुकीत राष्ट्रवादी कॉंग्रेस (अजित पवार) आणि भाजप यांच्या चुरशीने लढत झाली. १० प्रभागांपैकी ६ प्रभागांमध्ये चुरशीच्या लढती झाल्या आहेत. या निवडणुकीत विकासाचे मुद्दे चर्चिले गेले आहेत. बाहेरगावी रहिवासी असलेले लक्षणीय मतदार असून त्यांचा प्रभाव यावेळी दिसून आला. जेजुरीचा नगराध्यक्ष कोण होणार, याकडे सर्वांचे लक्ष लागले आहे. नगरपालिका निवडणुकीत प्रचारात रस्ते, पाणी, वीज, गटारी, नागरी असुविधा आदी विकास कामांच्या मुद्द्यावर आणि गेल्या पाच वर्षातील कारभाराचा “पंचनामा “होऊन आरोप – प्रत्यारोपांवर असलेली निवडणूक मतदानाच्या आदल्या दिवसांपासून “अर्थ” व्यवहाराकडे वळली. सर्वच पक्षांकडून झालेल्या मोठी उलाढाल झाल्याचे नागरिकांमधून बोलले जात आहे. बाहेरगावी असलेले ३ हजारांहून अधिक मतदारांनी जेजुरीत दाखल होत मतदान केले आहे. उद्योग व्यवसायानिमित्त रहिवासी असलेल्या परप्रांतीयांच्या मतदानामुळे काही प्रभागामध्ये विजयाची समीकरणे बदलण्याची शक्यता नाकारता येत नाही. १० वर्षांपेक्षा अधिक काळापासून बाहेरगावी वास्तव्यास असलेले मतदार शोधून त्यांना येण्याजाण्यासह सर्व सरबराई करण्यासाठी उमेदवारांना तारेवरची कसरत करावी लागली आहे. जेजुरीकरांची उत्कंठा शिगेला नागपूर खंडपीठाने दिलेल्या आदेशानुसार निवडणुकीचा निकाल २१ डिसेंबरला होणार असला तरी ३ डिसेंबरला विजयाच्या जल्लोषाची तयारीत असलेल्या समर्थकांच्या उत्साहावर विरजण पडले असले तरी उत्कंठा कायम आहे. नगराध्यक्ष पदासाठी राष्ट्रवादीचे उमेदवार बारभाई आणि सोनवणे या परिवारात पारंपरिक लढत झाली. फक्त पिढी बदलली आहे. १९७४ मध्ये लोकनियुक्त नगराध्यक्ष पदाच्या निवडणुकीत दिलीप बारभाई यांच्याविरोधात मोहन सोनवणे, ज्ञानोबा खोमणे यांच्यात लढत झाली. २००२ मध्ये पुन्हा लोकनियुक्त नगराध्यक्ष पदाच्या लढतीत दिलीप बारभाई विरुद्ध रामचंद्र सोनवणे, संजय इनामके, अशी लढत झाली होती. दोन्ही लढतीमध्ये दिलीप बारभाई यांचा विजय झाला होता. २०१६ मध्ये निवडणुकीत बारभाई यांच्या सूनबाई मीनल जयदीप बारभाई तर सोनवणे यांच्या सुनबाई वीणा हेमंत सोनवणे यांच्यात झालेल्या लढतीमध्ये २५२ मतांनी वीणा सोनवणे या निवडून आल्या होत्या. यंदाच्या निवडणुकीत राष्ट्रवादी (अजित पवार) जयदीप दिलीप बारभाई, भाजपाकडून सचिन रमेश सोनवणे, शिवसेना (शिंदे गट) पक्षाकडून दिनेश (विठ्ठल) सोनवणे असा तिरंगी सामना रंगला आहे. मूळचे शरद पवार यांचे विश्वासू समर्थक म्हणून बारभाई परिवाराची ओळख आहे. मात्र, माजी उपनगराध्यक्ष आणि अजित पवार यांचे विश्वासू संघटक गणेश निकुडे, रोहिदास कुंभार यांनी बारभाई परिवाराला राष्ट्रवादीच्या अजित पवार गटाकडे खेचले. अठरा पगड समाजबांधवांची मजबूत फळी उभी करून संभाजी ब्रिगेडचे संदीप जगताप यांनाही पक्षात खेचत त्यांच्यावर प्रचारप्रमुखाची जबाबदारी देत निवडणुकीचे चित्रच पालटून टाकले. समाजातील बहुतांश घटकांना विविध प्रभागात उमेदवारी देत राजकीय प्रवाहात आणत कार्यकर्त्यांची भक्कम मोट बांधण्यात गणेश निकुडे यांचा मोठा वाटा आहे. प्रत्येक प्रभागात उत्साहाने राबणारे कार्यकर्ते पाहता राष्ट्रवादीच्या जयदीप बारभाई यांना विजयाची खात्री आहे, अशी चर्चा रंगली आहे. भाजपाचे सचिन सोनवणे यांच्याकडूनही विजयाची खात्री दिली जात आहे. मात्र, शिवसेनेचे दिनेश (विठ्ठल) सोनवणे हे कुणाची किती मते खेचतात?यावर मताधिक्य अवलंबून असणार आहे. ५ प्रभागांत लक्षवेधी लढती जेजुरी नगरपालिका निवडणुकीमध्ये बहुतांश ठिकाणी दुरंगी तर प्रभाग २ व प्रभाग ७ मध्ये तिरंगी सामना रंगण्याची चिन्हे आहेत . बहुतांश प्रभागामध्ये राष्ट्रवादीच्या घड्याळाची टिकटिक तर काही प्रभागामध्ये कमळ फुलण्याची चिन्हे असल्याच्या चर्चेला उधाण आले आहे. विशेषतः प्रभाग १ मधील १ जागा, प्रभाग २ व ७ मध्ये तिरंगी सामना, प्रभाग ८ मध्ये २ जागा, प्रभाग ९ आदी प्रभागांमध्ये राष्ट्रवादीचे घड्याळ भाजपचे कमळ अशी चुरशीची लढत झाल्या आहेत. प्रभाग सहामध्ये काय होणार? मागील तीन निवडणुकांमध्ये बारभाई परिवाराचे विरोधक असलेले गणेश निकुडे यांनी राजकीय मतभेद विसरून बारभाई परिवाराला राष्ट्रवादीच्या (अजित पवार) प्रवाहात आणत जयदीप बारभाई यांना नगराध्यक्ष पदाची उमेदवारी देण्यात मोठा वाटा आहे. त्यातूनच निकुडे यांना विरोधकांनी प्रभाग ६ मध्ये लक्ष्य केल्याचे बोलले जाते. याच प्रभागातून माजी नगराध्यक्षा वीणा सोनवणे या देखील निवडणुकीला सामोऱ्या जात आहेत. राष्ट्रवादीकडून माजी नगरसेविका अमिना पानसरे या प्रभाग तीनमधून भाजपाच्या वीणा सोनवणे यांच्याशी लढत देत आहेत. दोन्ही प्रभागात सोनवणे निवडणूक लढवीत आहेत. तरी निकुडे आणि पानसरे यांच्या कार्यकर्त्यांकडून विजयाची खात्री देण्यात येत आहे.
