Ratan Tata | टाटा सन्सचे अध्यक्ष रतन टाटा यांचे बुधवारी रात्री निधन झाले. रतन टाटा यांच्या निधनानंतर देशभरात हळहळ व्यक्त करण्यात येत आहे. रतन टाटा यांचे सर्वात जवळचे मित्र आणि त्यांच्यासोबत सावलीसारखे राहणारे शंतनू नायडूने एक भावनिक पोस्ट लिहिली आहे. लिंक्डइनवरील पोस्टमध्ये, रतन टाटा यांचे जवळचे सहकारी शंतनू नायडू यांनी त्यांच्या घनिष्ठ मैत्रीवर प्रकाश टाकला आहे. “या मैत्रीने माझ्या आत एक पोकळी सोडली आहे, ती भरून काढण्याच्या प्रयत्नात मी आयुष्य घालवणार आहे. दु:ख ही प्रेमाची किंमत आहे. गुडबाय, माय डियर लाईटहाऊस,” असे शंतनू नायडूने पोस्टमध्ये म्हटले आहे. शंतनूने एक थ्रोबॅक फोटो देखील शेअर केला ज्यामध्ये ते दोघे एकत्र दिसत आहेत. शंतनु नायडू यांची रतन टाटांसोबतची मैत्री त्यांच्या प्राण्यांबद्दलच्या प्रेमातून फुलली. नायडू यांनी रात्रीच्या वेळी वाहनांच्या धडकेपासून भटक्या कुत्र्यांचे संरक्षण करण्यासाठी रिफ्लेक्टिव कॉलर तयार केली होती. याने प्रभावित होऊन रतन टाटांनी नायडूंना त्यांच्यासाठी काम करण्यासाठी बोलवून घेतले. गेल्या 10 वर्षात शंतनू नायडू हे रतन टाटा यांचे जवळचे आणि विश्वासू मित्र बनले शंतनु यांच्या कामाने टाटा खूप प्रभावित झाले होते. 2018 पासून रतन टाटा यांच्यासोबत शंतनु काम करत आहे. कोण आहेत शंतून नायडू? वयाच्या २८ व्या वर्षी शंतनू नायडूने व्यवसाय उद्योगात पाऊल ठेवले होते. शंतनू नायडूचा जन्म १९९३ मध्ये पुणे येथे झाला. टाटा ट्रस्टचे डेप्युटी जनरल मॅनेजर म्हणून शंतनू नायडू हे देशभरात खूप लोकप्रिय आहेत. शंतनू नायडूची गुडफेलोज ही कंपनी आहे. ज्येष्ठ नागरिकांना सुविधा मिळवून देण्यासाठी ही कंपनी कार्यरत असते.
