पुणे – पहाटेच्या शपथविधीची जखम अजूनही राष्ट्रवादी कॉंग्रेस कार्यकर्त्यांच्या मनात ओली असतानाच आज झालेल्या दुपारच्या शपथ विधीने “बॉम्ब’च फुटला. त्यामुळे अशा वेळी कोणाचा झेंडा हाती घ्यावा, हा प्रश्‍न राष्ट्रवादीच्या कार्यकर्त्यांच्या मनात निर्माण झाला असून, काकांबरोबर जायचे की पुतण्याबरोबर अशी त्यांची द्विधा अवस्था झाली आहे.

राजकारणाच्या आणि राजकारण्यांच्या दृष्टीने पुणे हे मुंबईनंतर महत्त्वाचे केंद्र आहे. शरद पवार, अजित पवार यांचा राबता याच शहरात आणि जिल्ह्यात जास्त असून, त्यांच्या पक्षाची ही राजधानीच आहे, असे म्हणावे लागेल. अर्थात बारामती जवळ असल्याने आणि एकूणच त्यांनी या शहरासह पश्‍चिम महाराष्ट्रात आपला “वट’ येथूनच “हॅंडल’ केला आहे. अजित पवार हे येथीलच पालकमंत्री होते. अनेक निर्णय या शहरातूनच त्यांनी घेतले आहेत, कारण पश्‍चिम महाराष्ट्रावर “होल्ड’ ठेवणारी बहुतांश विभागीय कार्यालये पुण्यात आहेत.

तथापि, अजित पवार यांनी आज घेतलेल्या भूमिकेमुळे राष्ट्रवादीच्या कार्यकर्त्यांमध्ये संभ्रमावस्था असून, त्यांच्याबरोबर जायचे, की शरद पवारांसोबत जायचे याविषयी त्यांच्या मनात प्रश्‍नचिन्ह निर्माण झाले आहे. त्यामुळेच दिवसभर प्रमुख पदाधिकाऱ्यांनी आपले मोबाइल बंद ठेवले असून, काहींनी ते रिसिव्ह न करणेच पसंत केले. काहींनी कार्यकर्त्यांकरवी “पर्सनल कामात आहेत, नंतर बोलतील’ असे निरोप देत माध्यमांशी बोलणे टाळले.

दोन आमदारांचे काय?
पुण्याचे शहराध्यक्ष प्रशांत जगताप आणि खासदार वंदना चव्हाण या राष्ट्रवादी कॉंग्रेसचे अध्यक्ष शरद पवार यांच्या बाजूनेच आहेत, असे तूर्तास तरी सांगण्यात आले आहे. मात्र चेतन तुपे आणि सुनील टिंगरे हे दोन आमदार कोणाच्या बाजुने, हे अद्याप स्पष्ट झाले नाही.

शरद पवार यांचे कार्यकर्त्यांना आवाहन

पवार हे सोमवारी सकाळी यशवंतराव चव्हाण यांच्या कऱ्हाड येथील समाधीस्थळी अभिवादन करण्यासाठी जाणार आहेत. शहर अध्यक्ष प्रशांत जगताप, खासदार वंदना चव्हाण यांच्या नेतृत्त्वाखाली शहरातील त्यांचे कार्यकर्ते त्यांच्याबरोबर जाणार आहेत. मोदीबागेच्या प्रवेशद्वाराजवळ सकाळी सात वाजता जमावे, असा निरोप कार्यकर्त्यांना देण्यात आला आहे. त्यामुळे आता मोदीबागेजवळ सकाळी सात वाजता कोण कोण कार्यकर्ते उपस्थित राहणार हे पाहणे महत्त्वाचे ठरणार आहे.

नियोजित कार्यक्रम रद्द

एवढी मोठी घटना झाल्याने राष्ट्रवादी कॉंग्रेस नेत्यांच्या उपस्थितीत होणारा गुरूजन गौरव समारंभ रद्द करण्यात आला आहे. गुरुपौर्णिमेनिमित्त (दि. 3 जुलै) हा कार्यक्रम होणार होता. खासदार सुप्रिया सुळे यांनीही आपल्या मतदारसंघात दौरा नियोजित केला होता. तोही रद्द करण्यात आला. या दौऱ्यात उद्‌घाटने, भेटीगाठी, बचत गटांचे कार्यक्रम होणार होते.

कार्यालय ओस

कायकर्त्यांनी कायम गजबजलेले राष्ट्रवादी कॉंग्रेसचे डेंगळे पुलाजवळ असलेले शहर कार्यालयातही आज ओस पडले होते. या ठिकाणी कायमच कार्यकर्त्यांचा राबता असतो. मात्र या सगळ्या परिस्थितीमुळे या कार्यालयात कोणी फिरकलेच नाहीत. कार्यालय कुलूपबंदच होते. परिसरात सन्नाटा होता.

तीन दिवसांपासून शरद पवार पुण्यात

गेल्या तीन दिवसांपासून राष्ट्रवादी कॉंग्रेसचे अध्यक्ष शरद पवार हे पुण्यात तळ ठोकून आहेत. शनिवारी त्यांनी माध्यमांच्या प्रतिनिधींना अनौपचारिक गप्पांसाठी बोलावले होते, परंतु या गोष्टीची साधी भनकही त्यांनी लागू दिली नाही. मात्र अजितदादांनी समृद्धी महामार्गावरील बस अपघाताचे कारण देत अनेक कार्यक्रम रद्द केल्याने काही जणांच्या मनांत शंकेची पाल चुकचुकली. त्याचा स्फोट मात्र रविवारी दुपारी झाला.