मुंबई : मुकेश अंबानी यांच्या अँटिलिया घराजवळ स्फोटके प्रकरणामुळे पूर्णपानस गोत्यात आलेले  मुंबई पोलीस दलातील अधिकारी सचिन वाझे सध्या तुरुंगात आहेत. दरम्यान, या प्रकरणामुळे राज्याचे तत्कालीन गृहमंत्री अनिल देशमुख यांनाही राजीनामा द्यावा लागला होता. एवढंच नाही तर त्यांना आता तुरूंगाची हवा खावी लागत आहे. या प्रकरणाचे मूळ असणाऱ्या सचिन वाझेबद्दल आज राज्याचे उपमुख्यमंत्री अजित पवार यांनी खोचक वक्तव्य केले आहे.

पुणे ग्रामीण पोलिसांच्या एका कार्यक्रमात बोलताना अजित पवार म्हणाले, “आधी काही गैरप्रकार झाला की इथे बोफोर्स झाला असं म्हटलं जायचं. अगदी खेडेगावात जरी काही झालं तरी बोफोर्स झालं म्हणायचे. आता असं म्हणतात की, याचा सचिन वाझे झाला. हा सचिन वाझे आहे. कुठुन दुर्दशा आठवली आणि त्याला सर्विसमधे घेतलं. अर्थात कायदा आपलं काम करतोय. पण एका व्यक्तीमुळे संपूर्ण पोलीस दल बदनाम होतं. ते होणार नाही याची सर्वांनी काळजी घ्या आणि चांगलं काम करा.

पुणे ग्रामीण अधीक्षक कार्यालय येथे चार चाकी आणि दुचाकी वाहनांचा लोकार्पण सोहळा उपमुख्यमंत्री अजित पवार, गृहमंत्री दिलीप वळसे पाटील यांच्या उपस्थितीत पार पडला. त्यावेळी अजित पवार त्यांच्या भाषणात पुढे म्हणाले की, माझा स्वतःचा फोन नंबर… एका बहाद्दर पठ्ठ्याने असं सॉफ्टवेअर डेव्हलप केलं की माझ्याच मोबाईल नंबरवरून फोन केल्याच वाटलं आणि वीस लाख रुपये मागितले. पण माझ्या नंबरवरून फोन केला की कॉलर आयडीमुळे फोन नंबर येत नाही हे ज्या व्यक्तीला फोन केला त्या व्यक्तीला माहित होतं. चौबे का कोणाचे नाव घेतले. आता याने केला होता की आणखी कोणी केला होता काय माहित?