वाघोली : वाघोली तालुका हवेली येथील दुबे नगर रस्त्याचा प्रश्न गंभीर बनला असून चार महिन्यांपूर्वी वर्क ऑर्डर मिळून देखील कामाला सुरुवात न झाल्याने नागरिकांनी सार्वजनिक बांधकाम विभागाचे विरोधात निषेध नोंदवत तातडीने काम सुरू करण्याची मागणी केली आहे.

भाजप नेते संदीप सातव यांच्या मार्गदर्शनाखाली दुबे नगर मधील नागरिकांनी घोषणा देत सार्वजनिक बांधकाम विभागाच्या कामाबद्दल निषेध नोंदवला. वाघोलीत केसनंद रस्त्यावरील दुबे नगर ते केसनंद रोड रस्त्याच्या कामाला विलंब झाल्याने नागरिक आक्रमक झाले आहेत.

केसनंद रोड ते दुबे नगर रोड या रस्त्याच्या कामाची वर्क ऑर्डर होऊन चार महिने उलटूनही ठेकेदाराने प्रत्यक्ष कामाला सुरुवात केलेली नाही. त्यामुळे संतप्त नागरिकांनी आज रस्ता रोखून पीडब्ल्यूडी अधिकाऱ्यांचा निषेध केला. रस्त्याची दुरवस्था आणि कामाला होत असलेल्या विलंबामुळे नागरिकांना मोठ्या अडचणींचा सामना करावा लागत आहे.

वारंवार मागणी करूनही काम सुरू होत नसल्याने नागरिकांनी आंदोलनाचा पवित्रा घेतला. संबंधित ठेकेदारावर कारवाई करून रस्त्याचे काम तातडीने सुरू करावे, अशी मागणी यावेळी नागरिकांनी केली. दरम्यान, पीडब्ल्यूडी प्रशासन याबाबत काय भूमिका घेणार आणि रस्त्याचे काम प्रत्यक्षात कधी सुरू होणार, याकडे नागरिकांचे लक्ष लागले आहे.