Bread Upma: रोज सकाळी नाश्त्याला काय बनवायचं, हा प्रश्न अनेकांना पडतो. सकाळची घाई, घरातील कामं आणि त्यात सगळ्यांसाठी चविष्ट नाश्ता तयार करण्याची कसरत सुरू असते. अशावेळी कमी वेळात तयार होणारा आणि चवीला भन्नाट असा ब्रेड उपमा तुमच्यासाठी उत्तम पर्याय ठरू शकतो. घरात उपलब्ध असलेल्या काही साध्या पदार्थांपासून हा नाश्ता काही मिनिटांत तयार करता येतो.

ब्रेड उपम्याची खास गोष्ट म्हणजे तो फक्त सकाळच्या नाश्त्यासाठीच नाही, तर संध्याकाळच्या चहासोबतही खाता येतो. अचानक घरी पाहुणे आले किंवा मुलांना नेहमीपेक्षा काहीतरी वेगळं आणि चटपटीत खायला द्यायचं असेल, तर ही रेसिपी नक्की उपयोगी पडू शकते.

ब्रेड उपमा बनवण्यासाठी साहित्य

ब्रेड उपमा तयार करण्यासाठी ५ ते ६ ब्रेड स्लाइस, एक बारीक चिरलेला कांदा, एक छोटा टोमॅटो, एक हिरवी मिरची, कढीपत्ता आणि कोथिंबीर घ्या. याशिवाय चवीनुसार मीठ, हळद आणि लाल तिखट लागेल. चव आणखी वाढवण्यासाठी थोडं चाट मसाला, शेंगदाणे आणि लिंबाचा रसही वापरू शकता.

आधी ब्रेडचे तुकडे करून घ्या

सर्वप्रथम ब्रेडचे छोटे चौकोनी तुकडे करून घ्या. तुम्हाला कुरकुरीत ब्रेड उपमा आवडत असेल, तर हे तुकडे कोरड्या तव्यावर थोडे भाजून घ्या. यामुळे ब्रेड जास्त मऊ होणार नाही आणि उपम्याला छान चव येईल. मात्र, ब्रेड जास्त वेळ भाजू नका. नाहीतर तुकडे खूप कडक होऊ शकतात.

फोडणी देऊन मसाला तयार करा

आता एका पॅनमध्ये थोडं तेल गरम करा. त्यात मोहरी, कढीपत्ता आणि शेंगदाणे घालून हलके भाजून घ्या. त्यानंतर त्यात हिरवी मिरची आणि बारीक चिरलेला कांदा घाला. कांदा थोडा सोनेरी रंगाचा झाला की त्यात चिरलेला टोमॅटो टाका. टोमॅटो थोडा मऊ झाल्यानंतर त्यात हळद, मीठ आणि लाल तिखट घाला. सर्व साहित्य चांगलं मिसळून काही वेळ परतून घ्या. यामुळे मसाल्याचा स्वाद छान खुलतो.

ब्रेड घाला आणि २-३ मिनिटांत उपमा तयार

मसाला तयार झाल्यानंतर त्यात ब्रेडचे तुकडे घाला. ब्रेडचे तुकडे हलक्या हाताने मिसळा, जेणेकरून ते जास्त तुटणार नाहीत. त्यावर थोडा चाट मसाला आणि बारीक चिरलेली कोथिंबीर घाला. आवडत असल्यास थोडा लिंबाचा रसही टाकू शकता. सगळं साहित्य व्यवस्थित मिसळल्यानंतर मंद आचेवर फक्त २ ते ३ मिनिटं शिजवा. जास्त वेळ शिजवण्याची गरज नाही. अशा प्रकारे काही मिनिटांत गरमागरम आणि चटपटीत ब्रेड उपमा तयार होईल.

आणखी चविष्ट बनवण्यासाठी या भाज्या घाला

ब्रेड उपमा अधिक पौष्टिक आणि चविष्ट करण्यासाठी त्यात मटार, गाजर, शिमला मिरची किंवा कॉर्न घालू शकता. मुलांसाठी बनवत असाल, तर तिखटाचं प्रमाण कमी ठेवून त्यांच्या आवडीच्या भाज्याही त्यात मिसळता येतील. ब्रेड आधी हलका भाजून घेतल्यास उपमा अधिक कुरकुरीत लागतो. तसेच ब्रेड घातल्यानंतर तो जास्त वेळ शिजवू नका. नाहीतर ब्रेड खूप मऊ होऊ शकतो.

तयार झालेला ब्रेड उपमा प्लेटमध्ये काढा. वरून कोथिंबीर आणि थोडा लिंबाचा रस घालून गरमागरम सर्व्ह करा. सकाळच्या नाश्त्यासाठी किंवा संध्याकाळच्या चहासोबत काहीतरी झटपट आणि चविष्ट खायचं असेल, तर ही रेसिपी नक्की ट्राय करू शकता.