मुंबई – साधारणपणे एटीएममधून चांगल्या किंबहुना कोऱ्या करकरीत नोटाच बाहेर येतात, क्वचितच फाटलेल्या नोटा येतात. मात्र एटीएम मधून जर 2000 किंवा 500 ची फाटलेली नोट निघाली तर मात्र डोक्याला ताप होऊ शकतो. कारण अनेक दुकानदार किंवा मोठी शोरूम अशा नोटा स्वीकारण्यास नकार देतात. त्याच वेळी सामान्य माणसाला या पैशाचेही खूप मोल असते. जर आपण एटीएममधून पैसे काढत असताना फाटलेल्या नोटा बाहेर आल्या तर नेमकं काय करावं यासाठी आरबीआयचे काही नियम आहेत. चला तर, जाणून घेऊया या समस्येवर आरबीआय काय म्हणते? * आरबीआयच्या नियमांनुसार तुम्ही बँकेत जाऊन जुन्या किंवा पेस्ट केलेल्या नोटा सहज बदलू शकता. नियम म्हणते की बँका त्या नोटा घेण्यास नकार देऊ शकत नाहीत आणि जर त्यांनी नकार दिला तर तुम्ही आरबीआयकडे तक्रार करू शकता, त्यानंतर त्या बँकेवर कारवाई केली जाऊ शकते. * आरबीआयचे नियम सांगतात की नोटा अनेक तुकड्यांमध्ये फाटलेल्या असल्या तरी त्या वापरल्या जाऊ शकतात. फाटलेल्या नोटेचा कोणताही भाग गहाळ झाला तरी तो बदलता येतो. सामान्य फाटलेल्या नोटा कोणत्याही बँकेच्या शाखा काउंटरवर किंवा रिझर्व्ह बँक ऑफ इंडियाच्या कोणत्याही जारी कार्यालयात कोणताही फॉर्म न भरता सहज बदलल्या जाऊ शकतात. जळालेल्या नोटांवर आरबीआयचा नियम – आरबीआय म्हणते की जर नोटा खूपच घाणेरड्या, नाजूक म्हणजे तुटण्यायोग्य किंवा जळालेल्या असतील तर अशा नोटा फक्त आरबीआयच्या इश्यू ऑफिसमध्ये बदलल्या जाऊ शकतात. आता प्रश्न उद्भवतो की अशा नोटांच्या बदल्यात पूर्ण पैसे मिळतात का ? आरबीआयच्या मते, ते नोटांची स्थिती आणि मूल्य यावर अवलंबून आहे. जर किरकोळ फाटलेल्या नोटा असतील तर त्यांच्यासाठी पूर्ण पैसे उपलब्ध होतात. तर जर नोट अधिक फाटलेली असेल तर तुम्हाला त्या नोटेच्या मूल्याच्या फक्त काही टक्के रक्कम परत मिळेल.
