मुंबई : राज्यात सध्या सर्वत्र शेतकऱ्यांच्या वीजबिल तोडणी विरोधात आंदोलन करण्यात येत आहे. असेच एक अंदोलन सध्या अहमदनगरच्या नेवासामध्ये सुरु होते. शेतकऱ्यांच्या वीजबिल तोडणी विरोधात भाजप आंदोलन करत होते. मात्र शेतकऱ्यांच्या मागण्या मेनी होत नसल्याचे पाहून भाजपच्याच आमदाराने सर्वांच्या समोर आत्महत्या करण्याचा प्रयत्न केला असल्याचे समोर आले आहे.

भाजपाचे माजी आमदार बाळासाहेब मुरकुटे यांनी वीज वितरणच्या कार्यालयातच गळफास लावून आत्महत्येचा प्रयत्न केला. अहमदनगरमधील कृषीपंप वीज तोडणीविरोधात भाजपाने आक्रमक भूमिका घेतली असून नेवासा येथील शेतकऱ्यांच्या वीज तोडणीविरोधात आंदोलन करताना त्यांना टोकाचं पाऊल उचललं. या घटनेचा व्हिडीओ सध्या सोशल मीडियावर व्हायरल झाला आहे.

नेवासा येथील वीज तोडणीविरोधात भाजपातर्फे वितरण कार्यालयाच्या परिसरात आंदोलन करण्यात येत होते. यावेळी भाजपाकडून पुन्हा एकदा वीज पुरवठा सुरळीत करण्याची मागणी करण्यात येत होती. बाळासाहेब मुरकुटेदेखील या आंदोलनात सहभागी झाले होते. आंदोलन करुनही मागणी मान्य होत नसल्यामुळे मुरकुटे यांनी नेवासा वीज वितरण कार्यालयात जाऊन गळफास लावून आत्महत्या करण्याचा प्रयत्न केला.

यावेळी तिथे उपस्थित इतर भाजपा नेते आणि कार्यकर्त्यांनी मुरकुटेंना रोखण्याचा प्रयत्न केला. सध्या त्यांची प्रकृती स्थिर असून खासगी रुग्णालयात उपचार सुरु आहेत. दरम्यान या घटनेचा व्हिडीओ सोशल मीडियावर व्हायरल झाला असून घडल्या प्रकाराने खळबळ उडाली आहे.