Weather Updates : राज्यात सध्या ढगाळ हवामान आणि हलक्या पावसाच्या शक्यतेमुळे थंडीचा जोर कमी होत आहे. किमान आणि कमाल तापमानात लक्षणीय वाढ नोंदवली गेली असून, भारतीय हवामान विभागाने (IMD) पुढील तीन दिवस थंडीचा कडाका कमी राहण्याचा अंदाज वर्तवला आहे. हवामान खात्याच्या माहितीनुसार, राज्यातील कोकण, मध्य महाराष्ट्र आणि मराठवाडा भागात ढगाळ वातावरणासह काही ठिकाणी हलक्या स्वरूपाचा पाऊस पडण्याची शक्यता आहे. आज कोकणातील पालघर, ठाणे, मुंबई, रायगड या जिल्ह्यांमध्ये ढगाळ हवामानासह काही भागांत हलका पाऊस होऊ शकतो. तसेच मध्य महाराष्ट्रातील पुणे, कोल्हापूर, सातारा, सांगली आणि मराठवाड्यातील नांदेड, लातूर या जिल्ह्यांमध्येही ढगाळ हवामानाबरोबर हलक्या पावसाची शक्यता व्यक्त करण्यात आली आहे. उद्या (१३ जानेवारी) अहिल्यानगर, पुणे, सातारा, छत्रपती संभाजीनगर, जालना, परभणी आणि बीड या जिल्ह्यांमध्ये ढगाळ हवामानासह काही ठिकाणी हलक्या पावसाची शक्यता आहे. कोकण, मध्य महाराष्ट्र आणि मराठवाडा भागात ढगाळ वातावरण कायम राहील. राज्यातील इतर जिल्ह्यांमध्येही ढगाळ हवामानाची शक्यता नाकारता येत नाही. या ढगाळ आणि पावसाळ्या स्थितीमुळे राज्यातील थंडीचा कडाका पुढील तीन दिवस कमी राहणार असून, तापमानात सरासरीपेक्षा जास्त वाढ होण्याची शक्यता आहे. यामुळे नागरिकांना थंडीपासून काही प्रमाणात दिलासा मिळेल, परंतु सकाळी धुके किंवा दव पडण्याची शक्यता कायम आहे.
