Weather Update : गेल्या काही दिवसांपासून उत्तर भारतात थंडीचा कडाका वाढत चालला आहे. अशात सकाळी पडणाऱ्या धुक्यांमध्ये देखील मोठ्या प्रमाणात वाढ होताना दिसून येत आहे. पंजाबमधील नवांशहर येथे किमान तापमान शून्य अंश सेल्सिअस होते. राजधानीच्या किमान तापमानात निश्चितच किंचित वाढ झाली. वाढत्या धुक्यांमुळे दिल्लीकडे येणाऱ्या 20 गाड्या पाच तास उशिराने धावल्या.

आयएमडीने सांगितले की, पुढील पाच दिवस उत्तर भारतात दाट धुके कायम राहण्याची शक्यता आहे. गेल्या पाच दिवसांपासून सतत थंडीच्या लाटेत असलेल्या दिल्लीत बुधवारी किमान तापमानात जवळपास दोन अंशांनी वाढ होऊन 5.7 अंशांची नोंद झाली.उत्तर प्रदेशातील बहुतांश जिल्ह्यांमध्ये धुक्याचा प्रभाव जाणवत आहे. धुक्यामुळे लोकांना अनेक समस्यांना सामोरे जावे लागत आहे.

रेल्वे आणि विमान उड्डाणांवर परिणाम
धुक्यामुळे रेल्वे आणि विमानसेवा प्रभावित होत आहेत. अनेक गाड्या तासनतास उशिराने धावत आहेत. अनेक उड्डाणेही रद्द करावी लागली. मेरठचे किमान तापमान ३.६ अंश सेल्सिअसवर पोहोचले. कानपूर आणि जवळपासच्या जिल्ह्यांतील बर्फाळ वाऱ्यामध्ये सूर्य दिसेनासा झाल्याने धुके वाढत चालले आहे. हरियाणातील कर्नालमध्ये किमान तापमान ३.४ अंश सेल्सिअसवर पोहोचले.

धुक्यामुळे अपघात
सकाळी दाट धुक्यामुळे वाहनचालकांना मोठा त्रास सहन करावा लागला. त्यामुळे जिंदमध्ये झालेल्या अपघातात चौघांचा मृत्यू झाला. कैथल येथे ट्रक उलटल्याने आठ गुरे मरण पावली. धुके आणि थंडीमुळे पंजाबमधील जनजीवन विस्कळीत झाले आहे. नवीन वर्षाच्या दिवशी सलग दोन आठवड्यांहून अधिक काळ राज्यात दाट धुके पडण्याची 22 वर्षांतील ही पहिलीच वेळ आहे.

उत्तराखंडमध्ये हवामान बदलले आहे. बुधवारी बद्रीनाथ, केदानाथ, यमुनोत्री आणि गंगोत्री तसेच औली आणि हेमकुंड साहिबमध्ये बर्फवृष्टी झाली. त्यामुळे डोंगरात थंडी वाढली आहे. रुद्रप्रयाग, चमोली, उत्तरकाशी, पिथौरागढच्या सखल भागात दिवसभर ढगाळ वातावरण होते. त्यामुळे कमाल तापमानात दोन ते चार अंश सेल्सिअसची घट नोंदवली गेली.