न्हावरे : इनामगाव येथील श्रीकांत ट्रॅक्टर्स गॅरेजसमोर वाहन अडवून शेतकऱ्यासह त्याच्या चुलत भावाला लाकडी दांडके, लाथाबुक्क्यांनी मारहाण केल्याची घटना शुक्रवार दि १० जुलै २०२६ रोजी सकाळी घडली. यावेळी शिवीगाळ व दमदाटी करत जीवे मारण्याची धमकी दिल्याचा आरोप फिर्यादीने केला आहे. या प्रकरणी एका महिलेसह चौघांविरुद्ध शिरुर पोलीस ठाण्यात फिर्याद दाखल करण्यात आली आहे.

याबाबत रमेश सोनबा वाळुंज (वय ४८, रा. वाळुंजपट, इनामगाव, ता. शिरूर, जि. पुणे) यांनी शिरुर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार प्रतिक रामदास मचाले, रामदास पाटीलबुआ मचाले, दादा पाटीलबुआ मचाले आणि मिनाक्षी रामदास मचाले (सर्व रा. इनामगाव, ता. शिरुर, जि.पुणे) यांच्याविरुद्ध तक्रार नोंदविण्यात आली आहे.

शिरुर पोलिसांनी दिलेल्या माहितीनुसार, शुक्रवार दि. १० जुलै रोजी सकाळी ९ वाजून १५ मिनिटांच्या सुमारास इनामगावच्या हद्दीतील श्रीकांत ट्रॅक्टर्स गॅरेजसमोर हि घटना घडली. फिर्यादी रमेश वाळुंज हे तेथून जात असताना आरोपींनी त्यांचे वाहन अडविल्याचा आरोप आहे.

त्यानंतर प्रतिक मचाले याने फिर्यादीची गचांडी पकडून हाताने व लाथाबुक्क्यांनी मारहाण केली. रामदास मचाले आणि दादा मचाले यांनी लाकडी दांडक्याने मारहाण केली, तर मिनाक्षी मचाले यांनीही लाथाबुक्क्यांनी मारहाण केल्याचे फिर्यादीत म्हटले आहे.

हि मारहाण सुरु असताना रमेश वाळुंज यांनी त्यांचा चुलत भाऊ इंद्रजित संपतराव वाळुंज यांना फोन करून घटनास्थळी बोलावले. इंद्रजित वाळुंज हे भांडण सोडविण्यासाठी आल्यानंतर त्यांनाही रामदास मचाले यांनी लाकडी दांडक्याने, तर प्रतिक मचाले यांनी हाताने व लाथाबुक्क्यांनी मारहाण केल्याचा आरोप करण्यात आला आहे.

या मारहाणीत रमेश वाळुंज आणि इंद्रजित वाळुंज हे दोघे जखमी झाल्याचे पोलिसांकडे दाखल करण्यात आलेल्या तक्रारीत नमूद करण्यात आले आहे. या मारहाणीनंतर आरोपींनी शिवीगाळ व दमदाटी करत, “तुमच्यामुळे आमचा एक जण गेला आहे, तुमचाही एक जण घालवणार,” असे म्हणत जीवे मारण्याची धमकी दिल्याचा गंभीर आरोप फिर्यादीने केला आहे. शिरुर पोलीस ठाण्याचे पोलीस निरीक्षक विनोद पाटील यांच्या मार्गदर्शनाखाली या घटनेचा पुढील अधिक तपास पोलीस हवालदार गवळी हे करत आहेत.