Water Tourism Project : सातारा जिल्ह्यातील जावळी तालुक्यातील मौजे मुनावळे येथे कोयना जलाशयावर उभारण्यात येत असलेल्या जागतिक दर्जाच्या जलपर्यटन प्रकल्पाच्या कामांना तात्काळ गती देऊन ती नियोजित कालमर्यादेत पूर्ण करण्याचे निर्देश सार्वजनिक बांधकाम मंत्री शिवेंद्रसिंहराजे भोसले आणि पर्यटन मंत्री शंभुराजे देसाई यांनी संबंधित विभागांना दिले. विधानभवनात बुधवारी झालेल्या संयुक्त बैठकीत या महत्त्वाकांक्षी प्रकल्पाचा सविस्तर आढावा घेण्यात आला.

महाराष्ट्र पर्यटन विकास महामंडळामार्फत (एमटीडीसी) राबविण्यात येणाऱ्या या प्रकल्पासाठी मंजूर निधी, आतापर्यंतचा खर्च, उपलब्ध आर्थिक तरतूद, उर्वरित निधीची आवश्यकता तसेच विविध विभागांकडील मंजुरींचा बैठकीत विभागनिहाय आढावा घेण्यात आला. प्रकल्पात कोणताही विलंब होणार नाही, यासाठी आवश्यक सर्व प्रशासकीय निर्णय तातडीने घेण्याच्या सूचनाही देण्यात आल्या.

बैठकीत मरीना, जेट स्की पार्किंग जेट्टी, अॅल्युमिनियम रॅम्प, लेक क्रूझिंग बोट, अल्ट्रा लक्झरी हाऊसबोट, सोलर इलेक्ट्रिक क्रूझिंग बोट्स, मल्टीहुल एफआरपी पॅसेंजर बोट, सी ब्रीचर, जेट बोट, फ्लाइंग बोट, कॅटामरान सेलिंग बोट, पॅरासेलिंग बोट, जेट स्की, जेटोव्हेटर आदी अत्याधुनिक जलक्रीडा सुविधा व उपकरणांच्या उभारणीचा आढावा घेण्यात आला. उपलब्ध उपकरणे तातडीने कार्यान्वित करण्याबरोबरच निविदा प्रक्रियेत असलेली कामे निश्चित मुदतीत पूर्ण करण्याचे निर्देश देण्यात आले.

याशिवाय महाराष्ट्र प्रदूषण नियंत्रण मंडळाची परवानगी, महावितरणकडून वीजपुरवठा, वन विभागाची ना हरकत, जलसंपदा विभागाशी संबंधित बाबी, धरण परिसरातील सुरक्षा व्यवस्था तसेच बोट क्लब संचालनासाठी आवश्यक सुविधांवरही चर्चा झाली. सर्व संबंधित विभागांनी परस्पर समन्वय राखून प्रकल्पातील अडचणी तातडीने दूर कराव्यात, असे निर्देश मंत्र्यांनी दिले.

यावेळी सार्वजनिक बांधकाम मंत्री शिवेंद्रसिंहराजे भोसले म्हणाले, की कोयना जलाशय परिसराला लाभलेले नैसर्गिक सौंदर्य आणि जागतिक दर्जाच्या सुविधा यांचा संगम झाल्यास देश-विदेशातील पर्यटक मोठ्या प्रमाणात आकर्षित होतील. त्यामुळे सातारा जिल्ह्याच्या पर्यटन विकासाला चालना मिळण्याबरोबरच स्थानिक युवकांसाठी रोजगाराच्या नव्या संधी निर्माण होतील आणि स्थानिक अर्थव्यवस्थेलाही बळ मिळेल. त्यामुळे प्रकल्पाच्या कामात कोणताही विलंब सहन केला जाणार नाही.

पर्यटन मंत्री शंभुराजे देसाई यांनी हा प्रकल्प महाराष्ट्राच्या पर्यटन क्षेत्रासाठी मैलाचा दगड ठरेल, असा विश्वास व्यक्त केला. पर्यावरणपूरक पर्यटन, अत्याधुनिक जलक्रीडा सुविधा आणि जागतिक दर्जाच्या सेवा उपलब्ध करून देण्यासाठी शासन कटिबद्ध असून, आवश्यक सर्व मंजुरी आणि प्रशासकीय प्रक्रिया तातडीने पूर्ण करण्यात येतील, असे त्यांनी सांगितले.

बैठकीस पर्यटन संचालनालयाचे संचालक मंगेश जोशी, महाराष्ट्र पर्यटन विकास महामंडळाचे सदस्य सचिव विजय पोवार, पर्यटन विभागाचे उपसचिव संतोष रोकडे उपस्थित होते. तर सातारा जिल्हाधिकारी संतोष पाटील यांच्यासह वन, जलसंपदा, महाराष्ट्र प्रदूषण नियंत्रण मंडळ, महावितरण आणि इतर संबंधित विभागांचे वरिष्ठ अधिकारी दूरदृश्य प्रणालीद्वारे सहभागी झाले.

बैठकीच्या अखेरीस प्रकल्पातील प्रत्येक घटकासाठी निश्चित कालमर्यादा ठरवून नियमित प्रगती आढावा घेण्याचा निर्णय घेण्यात आला. मौजे मुनावळे येथील जलपर्यटन केंद्र महाराष्ट्राच्या पर्यटन क्षेत्रातील जागतिक दर्जाचे आकर्षण ठरेल, असा विश्वास दोन्ही मंत्र्यांनी व्यक्त केला.