Water Connection Charges – महापालिकेकडून महंमदवाडीमधील दोराबजी पॅराडाईज येथील तीन पाण्याच्या टाक्या सुरू केल्या आहेत. त्यानंतर आता महापालिकेकडून या ठिकाणी सोसायट्या तसेच खासगी मिळकतींना नळजोड देण्यात येत आहेत. त्यासाठी महापालिकेच्या मान्यताप्राप्त प्लंबरकडून पालिकेने निश्चित केलेल्या शुल्कापेक्षा जादा शुल्क मागितले जात असल्यास महापालिकेच्या पाणी पुरवठा विभागाकडे तक्रार करावी, असे आवाहन पाणी पुरवठा विभागाकडून करण्यात आले आहे. या नळजोडांसाठी प्रत्येकी ५० हजार रुपये मागण्यात येत असल्याची चर्चा आहे. त्यामुळे, महापालिकेने या प्रकरणी खुलासा करीत नागरिकांनी पालिकेने निश्चित केलेले शुल्कच देण्याचे आवाहन सोसायट्यांना केले आहे. प्रशासनाने दिलेल्या माहितीनुसार, नवीन नळजोड मंजुरीसाठी लायसेन्स प्लंबरमार्फत प्रस्ताव सादर केल्यानंतर पाणीपुरवठा विभागाकडून जागा पाहणी करून मंजुरी दिली जाते. नळजोडासाठी आकार आणि व्यासानुसार अधिकृत शुल्क आकारले जाते. पाण्याच्या मुख्य लाईनपासून मीटरपर्यंतचे काम महापालिकेकडून केले जाते, तर मीटरनंतरचे अंतर्गत प्लंबिंगचे काम संबंधित लायसेन्स प्लंबरमार्फत केले जाते. नवीन टाक्यांच्या माध्यमातून १२०० ते १५०० सोसायट्यांना नळजोड दिले जाणार आहेत. पुणे महापालिका. तर यापूर्वी नळजोड असलेल्या सोसायट्यांना नव्याने नळजोड घेण्याची आवश्यकता नसल्याचेही स्पष्ट करण्यात आले आहे. लायसेन्स प्लंबरांकडून कोणत्याही प्रकारची अवाजवी मागणी किंवा गैरप्रकार होत असल्यास नागरिकांनी कार्यकारी अभियंता, लष्कर पाणीपुरवठा विभागाकडे तत्काळ लेखी तक्रार करावी, असे महापालिकेने म्हटले आहे. असे आहे शुल्क पाणीपुरवठा विभागाकडून जागा पाहणी करून नळजोड मंजुरी दिली जाते. सन २०२६-२७ साठी घरगुती अर्धा इंच नळजोडासाठी १ हजार ४७५ रुपये, पाऊण इंचासाठी २ हजार ९४६ रुपये, एक इंचासाठी ७ हजार ७५७ रुपये, तर दीड ते दोन इंच नळजोडासाठी १९ हजार ३९४ रुपये शुल्क निश्चित करण्यात आले आहे. बिगर घरगुती नळजोडासाठी वेगवेगळे दर लागू आहेत.
