Upma Recipe: सकाळच्या धावपळीमध्ये पटकन तयार होणारा, चविष्ट आणि पौष्टिक नाश्ता कोणता, असा प्रश्न अनेक गृहिणींना पडतो. अशावेळी रवा उपमा हा उत्तम पर्याय ठरतो. कमी तेल, रवा आणि ताज्या भाज्यांचा वापर करून तयार होणारा हा पदार्थ काही मिनिटांत तयार होतो. लहान मुलांपासून ते मोठ्यांपर्यंत सर्वांनाच आवडणारा हा नाश्ता आता फक्त दक्षिण भारतापुरता मर्यादित राहिलेला नसून देशभरात लोकप्रिय झाला आहे.   (Upma Recipe)

उपमा अनेकदा चिकट होतो किंवा गुठळ्या तयार होतात. मात्र, काही सोप्या टिप्स लक्षात ठेवल्यास अगदी मोकळा, दाणेदार आणि स्वादिष्ट उपमा सहज बनवता येतो. योग्य प्रमाणात पाणी, आधी भाजलेला रवा आणि गरम पाण्याचा वापर हे त्याचे मुख्य रहस्य आहे.  (Upma Recipe)

साहित्य (2 जणांसाठी)  (Upma Recipe)

– 1 कप बारीक रवा
– 2 ते 2½ कप उकळते पाणी
– 2 टेबलस्पून तूप किंवा तेल
– ½ टीस्पून मोहरी
– ½ टीस्पून जिरे (ऐच्छिक)
– 1 टीस्पून उडीद डाळ
– 1½ टीस्पून चणा डाळ
– 8 ते 12 काजू किंवा शेंगदाणे
– 1 बारीक चिरलेला कांदा
– 1 ते 2 हिरव्या मिरच्या
– अर्धा इंच बारीक चिरलेले आले
– काही कढीपत्त्याची पाने
– चिमूटभर हिंग
– चवीनुसार मीठ
– ½ टीस्पून साखर (ऐच्छिक)
– अर्ध्या लिंबाचा रस
– 2 टेबलस्पून चिरलेली कोथिंबीर
– ¼ कप मटार आणि बारीक चिरलेले गाजर

कृती

सर्वप्रथम एका कढईत मध्यम आचेवर रवा 4 ते 5 मिनिटे कोरडा भाजून घ्या. रवा हलका सोनेरी रंगाचा झाला आणि त्यातून छान सुगंध येऊ लागला की तो एका भांड्यात काढून थंड होण्यासाठी ठेवा.

त्याच कढईत तूप किंवा तेल गरम करा. त्यात मोहरी घालून तडतडू द्या. त्यानंतर जिरे, उडीद डाळ, चणा डाळ आणि काजू किंवा शेंगदाणे घालून हलके सोनेरी होईपर्यंत भाजा. आता हिंग, हिरव्या मिरच्या, आले, कढीपत्ता आणि कांदा घालून परता. कांदा पारदर्शक झाल्यानंतर मटार आणि गाजर घालून दोन मिनिटे शिजवा. यानंतर 2 ते 2½ कप उकळते पाणी घाला. त्यात मीठ आणि साखर घालून पाण्याला चांगली उकळी येऊ द्या. उकळते पाणी वापरल्याने उपमा चिकट होत नाही आणि दाणेदार बनतो.

आता गॅस मंद करा. एका हाताने भाजलेला रवा हळूहळू पाण्यात टाका आणि दुसऱ्या हाताने सतत हलवत राहा. त्यामुळे गुठळ्या तयार होत नाहीत. काही मिनिटांत मिश्रण घट्ट होऊ लागेल. यानंतर झाकण ठेवून गॅस बंद करा आणि 3 ते 5 मिनिटे उपमा वाफेवर मुरू द्या. शेवटी त्यात लिंबाचा रस, थोडे तूप आणि चिरलेली कोथिंबीर घालून हलक्या हाताने मिसळा.

अशा पद्धतीने तयार केलेला रवा उपमा मोकळा, दाणेदार आणि अतिशय स्वादिष्ट लागतो. सकाळच्या नाश्त्यासाठी किंवा संध्याकाळच्या हलक्या खाण्यासाठी हा एक उत्तम आणि पौष्टिक पर्याय आहे.