Glowing Skin: आजकाल प्रत्येकालाच स्वच्छ, निरोगी आणि तजेलदार त्वचा हवी असते. मात्र प्रदूषण, धूळ, धूर, उन्हाचा संपर्क आणि बदलती जीवनशैली यामुळे त्वचेवर पिंपल्स, टॅनिंग आणि डाग-धब्बे दिसू शकतात. यासाठी अनेक जण महागड्या स्किनकेअर प्रोडक्ट्सचा वापर करतात. मात्र काही घरगुती उपायही त्वचेला ताजेतवाने ठेवण्यास मदत करू शकतात. त्यापैकीच एक म्हणजे बीटपासून तयार केलेला फेसपॅक.

बीटमध्ये विविध पोषक घटक आणि अँटिऑक्सिडंट्स असतात. त्यामुळे आहारात बीटचा समावेश करणे आरोग्यासाठी फायदेशीर ठरू शकते. त्याचबरोबर बीटपासून तयार केलेला फेसपॅक त्वचेला ताजेपणा देण्यास आणि त्वचा स्वच्छ दिसण्यास मदत करू शकतो. मात्र, यामुळे डाग-धब्बे कायमचे दूर होतील किंवा त्वचेचा रंग बदलेल, असा दावा करता येत नाही.

प्रदूषणामुळे त्वचेवर होतो परिणाम

दिवसभर धूळ, प्रदूषण, घाम आणि सूर्यप्रकाशाच्या संपर्कात आल्याने त्वचेवर परिणाम होऊ शकतो. काही लोकांना यामुळे पिंपल्स, टॅनिंग किंवा त्वचा कोरडी आणि निस्तेज दिसण्याची समस्या जाणवते. अशावेळी त्वचेची योग्य स्वच्छता आणि नियमित काळजी घेणे महत्त्वाचे आहे. त्यासोबतच त्वचेला अनुकूल असे पदार्थ वापरणे गरजेचे आहे.

बीटचा फेसपॅक तयार करण्यासाठी काय लागेल?

हा घरगुती फेसपॅक तयार करण्यासाठी काही साधे पदार्थ लागतात.

• १ चमचा बीट पावडर
• १ चमचा ऑरेंज पील पावडर
• १ चमचा मुलतानी माती
• १ चमचा गुलाबाच्या पाकळ्यांची पावडर
• साधारण ३ चमचे गुलाबजल

फेसपॅक कसा तयार कराल?

सर्वप्रथम एका स्वच्छ वाटीत बीट पावडर आणि ऑरेंज पील पावडर घ्या. त्यामध्ये मुलतानी माती आणि गुलाबाच्या पाकळ्यांची पावडर मिसळा. त्यानंतर आवश्यकतेनुसार गुलाबजल घालून सर्व साहित्य व्यवस्थित एकत्र करा.

याची मध्यम घट्टपणाची पेस्ट तयार करा. फेसपॅक लावण्यापूर्वी चेहरा स्वच्छ धुवा. त्यानंतर तयार केलेली पेस्ट चेहऱ्यावर हलक्या हाताने लावा. डोळ्यांच्या आणि ओठांच्या आसपासचा भाग टाळा. काही वेळाने चेहरा साध्या पाण्याने स्वच्छ धुवा. या फेसपॅकमुळे त्वचेला ताजेतवाने वाटू शकते. मात्र, प्रत्येक व्यक्तीच्या त्वचेचा प्रकार वेगळा असल्याने परिणामही वेगवेगळे असू शकतात.

वापरण्यापूर्वी ही काळजी घ्या

घरगुती उपाय प्रत्येकाच्या त्वचेला योग्य ठरतीलच असे नाही. विशेषतः संवेदनशील त्वचा, अॅलर्जी, पिंपल्स किंवा त्वचेशी संबंधित अन्य समस्या असल्यास कोणताही नवीन फेसपॅक वापरण्यापूर्वी त्वचारोग तज्ज्ञांचा सल्ला घेणे योग्य आहे. तसेच चेहऱ्यावर वापरण्यापूर्वी थोड्या भागावर पॅच टेस्ट करणे चांगले. जळजळ, खाज, लालसरपणा किंवा अन्य त्रास जाणवल्यास वापर थांबवावा.

महत्त्वाचे म्हणजे, ग्लोइंग स्किनसाठी केवळ फेसपॅकवर अवलंबून राहण्यापेक्षा संतुलित आहार, पुरेसे पाणी, नियमित झोप, त्वचेची स्वच्छता आणि सूर्यप्रकाशापासून योग्य संरक्षण याकडेही लक्ष देणे गरजेचे आहे.