आयुक्त श्रावण हर्डीकर यांची माहिती; अतिरिक्त पाणीसाठ्याची आवश्यकता पिंपरी – पिंपरी चिंचवड शहराला पाणी पुरवठा करणारे पवना धरण दोनवेळा शंभर टक्के भरले आहे. मात्र महापालिकेकडून शहरवासियांना दिवसाआडच पाणीपुरवठा सुरू आहे. मागील दीड वर्षापासून दिवसाआड पाणी पुरवठा सुरू असल्याने नागरिकांमध्ये पालिका प्रशासन आणि सत्ताधाऱ्यांविरोधात संतापाची भावना आहे. परंतु, जोपर्यंत 50 एमएलडी अतिरिक्त पाणी साठा उपलब्ध होत नाही. तोपर्यंत नागरिकांना दिवसाआड पाणी पुरवठा कायम राहणार आहे. दररोज पाणी पुरवठा करण्यासाठी शहरवासीयांना आणखी एक वर्ष तरी वाट पाहावी लागेल, अशी माहिती महापालिका आयुक्त श्रावण हर्डीकर यांनी पत्रकारांशी बोलताना दिली. हर्डीकर म्हणाले की, पिंपरी चिंचवडची लोकसंख्या दिवसेंदिवस वाढत आहे. पाणी पुरवठ्यांच्या समस्या प्राधान्याने सोडवण्यात येत आहेत. शहराचा पाणी पुरवठा सुरळीत करण्यासाठी विविध योजना राबविण्यात येत आहेत. त्यामध्ये आंद्रा, भामा-आसखेड प्रकल्पांच्या कामांना गती देवून सर्व कामे तातडीने पूर्ण करण्यात येत आहेत. या योजनेतून वर्षभरात अतिरिक्त शंभर एमएलडी पाणी उपलब्ध करण्याचा प्रयत्न सुरु आहेत. पिंपरी चिंचवड शहराच्या दृष्टीने पवना जलवाहिनी प्रकल्प महत्वकांक्षी आहे. या प्रकल्पावरील स्थगिती उठवण्यासाठी आमचा राज्यस्तरावर पाठपुरावा सुरु आहे. त्यामुळे पवना जलवाहिनी प्रकल्पांचा प्रशासकीय पातळीवरील आराखडा तयार करण्यात येत आहे. पवना धरणात शहराला केवळ 425 एमएलडी पाणी कोटा राखीव आहे. पण शहरवासीयांची तहान भागवण्यासाठी 480 एमएलडी पर्यंत अतिरिक्त पाणी साठा उचलला जात आहे. पवना जलवाहिनीमुळे पाणी गळती रोखण्यात यश येईल. शिवाय 30 टक्के पाणी बचत होईल. तसेच शहराला पाणी कमी पडू लागल्यास आपण आणखी 600 एमएलडी पर्यंत अतिरिक्त पाणी उचलले जाईल, असेही आयुक्त यावेळी म्हणाले. शहरात अमृत योजनेंतून चोवीस तास पाणी पुरवठा करण्यासाठी दोन टप्प्यांतील कामे प्रगतीपथावर आहेत. त्यात शहरातील पहिल्या टप्प्यात 40 टक्के आणि दुसऱ्या टप्प्यांत 60 टक्के काम करण्यात येत आहे. त्या दोन्ही टप्प्यांतील सुमारे 80 टक्के काम पूर्ण झाले आहे. तसेच उर्वरीत कामे येत्या डिसेंबरअखेर पूर्ण होतील. अनधिकृत नळजोडणी विरोधात कारवाई शहरातील पाणी गळती रोखण्यासाठी विविध उपाय योजना राबविण्यात येत आहेत. त्याचाच एक भाग म्हणून अनधिकृत नळजोडणी धारकांविरोधात नळतोडणी मोहीम राबविली जाणार असल्याची माहिती हर्डीकर यांनी यावेळी दिली. अनधिकृत कनेक्शन अधिकृत करण्यासाठी अवधी देण्यात आला होता. मात्र अनेकांनी कनेक्शन अधिकृत केलेली नाहीत. ज्यांनी कनेक्शन अधिकृत न करता अनधिकृत पाणीउपसा सुरू ठेवला आहे त्यांचे कनेक्शन तोडण्याची कारवाई करण्यात येणार आहे.
