वाघोली : महाराष्ट्र राज्य कुस्तीगीर संघ यांच्या मान्यतेने रामकृष्ण सातव पाटील आयोजित ६८वी महाराष्ट्र केसरी २०२५-२६ स्पर्धेचा पवित्र प्रारंभ म्हणून वासापूजन व मातीपूजन सोहळा सोमवार, दि. २ मार्च २०२६ रोजी सकाळी १० वाजता, बाजारतळ मैदान, वाघोली, पुणे येथे संपन्न झाला. तसेच महाराष्ट्र केसरी कुस्ती स्पर्धेच्या इतिहासातील सर्वात भव्य व मोठे दिले जाणारे पहिले बक्षीस फॉरच्यूनर गाडी देखील यावेळी जाहीर करण्यात आले. वाघोली येथे प्रथमच एवढ्या भव्य स्वरूपात महाराष्ट्र केसरी स्पर्धेचे आयोजन होत असून, हा सोहळा वाघोलीकरांसाठी ऐतिहासिक क्षण ठरणार आहे. कुस्ती परंपरेचा सन्मान राखत आणि महाराष्ट्राच्या मातीचा गौरव वाढवत स्पर्धेची भव्य सुरुवात करण्यात आली आहे. या शुभारंभ सोहळ्यास प्रमुख पाहुणे म्हणून मुरलीधर मोहोळ (केंद्रीय राज्यमंत्री, सहकार व नागरी हवाई वाहतूक तथा खासदार, पुणे) यांची प्रमुख उपस्थिती लाभली आहे. आयोजक कमिटी,६८ वी महाराष्ट्र केसरी २०२५-२६ स्पर्धा समिती वाघोली, पुणे रामकृष्ण सातव पाटील आणि समस्त ग्रामस्थ वाघोली व पंचक्रोशी यांच्या वतीने कार्यक्रमाचे आयोजन करण्यात आले आहे.
