वाघोली : वाघोली येथील राजेश्वरी नगरी मधील आलोवेरी सोसायटीतील एका फ्लॅटमध्ये रेकॉर्डवरील तडीपार व सराईतांकडून चार पिस्टल, ८ जिवंत काडतुसे पोलिसांनी जप्त केली आहेत. याप्रकरणी वाघोलीतील तिघे व पिस्टल विकणाऱ्या एकावर वाघोली पोलीस ठाण्यात गुन्हा दाखल करण्यात आला आहे. गुन्हे शाखा खंडणी विरोधी २ च्या पथकाने ही कारवाई केली आहे.

गोपाळ संजय यादव (वय २४), अमन ऊर्फ मुन्ना दस्तगीर पटेल (वय २३), इशाप्पा ऊर्फ विशाल जगन्नाथ पंदी (वय २४, तिघेही रा. वाघोली), देवानंद शिवाजी चव्हाण (वय २३, रा. शिरुर) अशी अटक केलेल्या चौघांची नावे आहेत.

याबाबत मिळालेल्या माहितीनुसार, वाघोलीतील एका फ्लॅटमध्ये रेकॉर्डवरील गुन्हेगार एकत्र जमले असून त्यांच्याकडे शस्त्रे असल्याची माहिती गुन्हे शाखा खंडणी विरोधी पथकाला मिळाली त्यानुसार पोलिसांनी सापळा रचून फ्लॅटवर छापा टाकला. तेथे हे यादव, पटेल व पंदी मिळून आले. त्यांच्याकडून ४ पिस्टल व ८ काडतुसे जप्त केली. चव्हाण याच्याकडून पिस्टल विकत घेतल्याचे समजल्यानंतर त्यास कोंढापुरी येथे पकडले. चौघांवर गुन्हा दाखल करण्यात आला आहे.

गोपाळ संजय यादव (वय २४, रा. वाघोली) याच्यावर दरोडा, खुनाचा प्रयत्न, राईट असे एकूण २ गंभीर गुन्हे दाखल आहेत. अमन ऊर्फ मुन्ना दस्तगीर पटेल (वय २३, रा. वाघोली) याच्यावर अहिल्यानगर येथे तसेच लोणीकंद पोलीस ठाणे येथे आर्म अ‍ॅक्टचा गुन्हा व तडीपार याप्रमाणे ३ गुन्हे दाखल आहेत. इशाप्पा ऊर्फ विशाल जगन्नाथ पंदी (वय २४, रा. वाघोली) यांच्यावर मोक्का, दरोडा, आर्म अ‍ॅक्ट, तडीपार असे गंभीर स्वरुपाचे एकूण ५ गुन्हे दाखल आहेत.