Wagholi Bhavadi Road – हवेली तालुक्यातील वाघोली-भावडी रस्ता अवजड वाहतुकीमुळे पूर्णतः खड्डेमय होऊन नागरिकांसाठी डोकेदुखी ठरला होता. या संदर्भात सातत्याने मागणी व प्रसिद्ध झालेल्या वृत्ताची दखल घेत अखेर रस्त्याच्या दुरुस्तीच्या कामाला सुरुवात करण्यात आली आहे. त्यामुळे स्थानिक नागरिकांमध्ये समाधान व्यक्त होत आहे. पुणे महानगरपालिकेचे नगरसेवक रामभाऊ दाभाडे आणि अनिल सातव यांनी संबंधित अधिकार्यांसह रस्त्याची पाहणी करून तातडीने काम सुरू करण्याचे आदेश दिले. या रस्त्याच्या दुरुस्तीसाठी सुमारे 50 लाख रुपयांचा निधी उपलब्ध करून देण्यासाठी त्यांनी पाठपुरावा केला होता. वाघोली-भावडी रस्ता हा परिसरातील वाहतूक कोंडी कमी करणारा पर्यायी मार्ग म्हणून ओळखला जातो. तत्कालीन पालकमंत्री गिरीश बापट आणि आमदार बाबुराव पाचरणे यांच्या माध्यमातून पीएमआरडीएतून या रस्त्याचे काम पूर्वी करण्यात आले होते. मात्र वाढत्या अवजड वाहतुकीमुळे रस्त्याची दुरवस्था झाली होती. खड्ड्यांमुळे नागरिकांना प्रवास करताना मोठ्या अडचणींचा सामना करावा लागत होता. या पार्श्वभूमीवर माजी उपसरपंच राजेंद्र सातव पाटील तसेच सामाजिक कार्यकर्ते सुनील जाधवराव यांनी सातत्याने पाठपुरावा करत निधीची मागणी केली होती. अखेर प्रत्यक्ष कामाला सुरुवात झाल्याने नागरिकांनी समाधान व्यक्त केले आहे. “वाघोली-भावडी रस्त्याच्या दुरुस्तीचे काम सुरू करण्यात आले आहे. अवजड वाहतुकीवर नियंत्रण ठेवण्यासाठी योग्य उपाययोजना करण्यात येत असून यासाठी वाहतूक पोलिसांची नेमणूक केली आहे. नियमांचे उल्लंघन करणार्यांवर कडक कारवाई करण्यात येईल.” – राहुल कोळंबीकर, सहाय्यक पोलीस निरीक्षक, वाघोली वाहतूक विभाग, पुणे.
