इंदूर : पैसे, मद्य, भेटवस्तू स्वीकारून मतदान करणारे हे पुढच्या जन्मी उंट, शेळ्या, कुत्रा, मांजर होतील, असे वादग्रस्त वक्तव्य मध्य प्रदेशमधील भाजप आमदार आणि माजी मंत्री उषा ठाकूर यांनी केले. त्या घटनेचा व्हिडीओ सध्या सोशल मीडियावर तुफान व्हायरल होत आहे. इंदूरच्या महू विधानसभा मतदारसंघातील हसलपूर गावात एका सभेत त्या बोलत होत्या. सभेत ठाकूर यांनी सांगितले की, भाजपच्या लाडली बहना, किसान सन्मान योजनांमुळे लाभार्थ्याच्या खात्यात हजारो रुपये जमा होतात. तरीही जर कोणी पाचशे-हजार रुपयांच्या बदल्यात आपले मत विकत असेल, तर ती लाजिरवाणी गोष्ट आहे. आपली प्रत्येक कृती इश्वर पाहात असतो. त्यामुळे लोकांनी अतिशय प्रामाणिक वृत्तीने मतदान करावे, असे आवाहन ठाकूर यांनी केले. देव पाहत आहे, मतदान करताना तुमचा प्रामाणिकपणा गमावू नका. पैसे, साडी, ग्लास आणि दारू घेऊन तटस्थ झालेल्यांनी त्यांच्या डायरीत लिहावं की, ते पुढच्या आयुष्यात नक्कीच उंट, मेंढी, बकरी, कुत्रा आणि मांजर बनतील. जे लोकशाही विकतील ते हेच होतील. हे लिहून ठेवा. माझा देवाशी थेट संवाद आहे, माझ्यावर विश्वास ठेवा, असं त्या म्हणाल्या. आमदार उषा ठाकूर म्हणाल्या की, भाजप हा देश, धर्म यांची सेवा करतो. त्यामुळे केवळ या पक्षालाच जनतेने मतदान करावे. आपल्या कर्मानुसार पुढील जन्माचा निर्णय होतो. जर कर्म वाईट असतील, तर माणूस म्हणून पुन्हा जन्म मिळत नाही, असं वादग्रस्त विधान ठाकूर यांनी केले. यांच्या विधानानंतर मध्य प्रदेश काँग्रेसचे प्रवक्ते मृणाल पंत यांनी सांगितले की, आमदार उषा ठाकूर यांचे विधान संकुचित विचारसरणीचे प्रतीक आहे.
